யாழ்.சிற்றங்காடியில் பேய் , பிசாசு நடமாடி திரிவதாக கூறப்படுவது கட்டுக்கதை. எமது வியாபாரத்திற்கு எதிரானவர்களால் கட்டிவிடப்பட்ட கட்டுக்கதை என யாழ்.சிற்றங்காடி வியாபரிகள் ஒரு சாரார் தெரிவித்துள்ளனர்.
யாழ்.மத்திய பேருந்து நிலையத்திற்கு அருகாமையில் யாழ்.மாநகர சபையினால் புதிதாக அமைத்துக்கொடுக்கப்பட்ட சிற்றங்காடி கடை தொகுதியில் அமானுசிய சக்திகளின் நடமாட்டம் உள்ளதாக செய்திகள் வெளியாகி இருந்தன.
குறித்த செய்தி கட்டுக்கதை எனவும் அவ்வாறு பேய் பிசாசு நடமாட்டம் எதுவும் இங்கில்லை என வியாபாரிகள் ஒருசாரார் தெரிவித்துள்ளனர். அவர்கள் அது தொடர்பில் தெரிவிக்கையில் ,
இங்குள்ள சிற்றங்காடி கடை தொகுதியில் 76 கடைகள் உள்ளன. அதன் மூலம் 125 குடும்பங்களை சேர்ந்தவர்கள் இங்கு தொழில் வாய்ப்பினை பெற்று உள்ளனர். இங்கு இரண்டு வியாபாரிகள் உயிரிழந்துள்ளனர்.
இரு வியாபாரிகளும் நீண்டகாலமாக நோய் வாய்ப்பட்டு சிகிச்சை பெற்று வந்த நிலையில் தான் உயிரிழந்து உள்ளனர். ஒருவர் சிறுநீரகம் செயலிழந்து இருந்தமையால் நோய் வாய்ப்பட்டு இறந்தார். மற்றவர் மாரடைப்பு காரணமாக உயிரிழந்துள்ளார். அவர்கள் பேய் பிசாசு அடித்து உயிரிழக்கவில்லை. நோய் வாய்ப்பட்டு உயிரிழந்தார்கள்.
மற்றும் மாநகர சபை ஆணையாளரிடம் புதிய கடைத்தொகுதிக்கு சாந்தி செய்ய வேண்டும் என கோரி இருந்தது உண்மை தான். எமது இந்து மரபின் படி நாம் புதிய தொழில் முயற்சிகளை ஆரம்பிக்கும் போது புதிய கடை திறக்கும் போது சாந்தி செய்வது வழமை. ஆனால் இந்த கடைகள் திறக்கும் போது அவ்வாறு சாந்தி செய்யவில்லை. மற்றும் ஆடி மாதத்தில் கடை திறந்தமையினால் மனதிற்கு சங்கடமாக இருக்கின்றது. அதனால் சாந்தி செய்வதற்கு ஏற்பாடுகள் செய்து தருமாறு யாழ்.மாநகர சபை ஆணையாளரை கோரியுள்ளோம். அவரும் அதற்கு சம்மதித்துள்ளார்.
நாம் சாந்தி செய்ய கோரியது எமது மதம் சார்ந்த நம்பிக்கைக்காகவே தவிர பேய் பிசாசுக்கு பயந்தில்லை பேய் பிசாசு என்பதை இந்த காலத்தில் நம்புவது முட்டாள் தனமான மூட நம்பிக்கை அப்படி இங்கு எதுவுமில்லை. தொழில் போட்டி காரணமாக சிலர் அவ்வாறான கட்டுக்கதைகளை கட்டி விட்டுள்ளனர். மக்கள் அச்சப்படாமல் எமது கடைகளுக்கு வந்து பொருட்களை கொள்வனவு செய்து செல்லலாம். என தெரிவித்தனர்.
