சட்டவிரோத மதுபான செயற்பாடு- நால்வரிடம் தண்டம் அறவீடு-  நால்வருக்கெதிராக வழக்கு  

கொரோனா வைரஸ் அனர்த்தம் காரணமாக  அசாதாரண சூழலில்  அம்பாறை மாவட்டத்தில்  சட்டவிரோதமான    மதுபான  செயற்பாட்டில்  கைதான  நால்வரிடம் தண்டப்பணம் அறவிடப்பட்டுள்ளதாக   கல்முனை மதுவரி   நிலைய பொறுப்பதிகாரி பொ.செல்வகுமார் தெரிவித்தார்.

ஊரடங்கு சட்டம்  அமுலில் இருந்த சந்தர்ப்பத்தில் செவ்வாய்க்கிழமை(5) மாலை   மதுவரி திணைக்களத்தினால் மேற்கொள்ளப்பட்ட திடீர்  சுற்றிவளைப்பின் போது  நான்கு சந்தேக நபர்கள் கைதாகியதுடன்  இன்று (6) அக்கரைப்பற்று நீதிமன்றத்தில்  வழக்குத்தாக்கல் செய்யப்பட்ட நிலையில் ஒவ்வொரு சந்தேக நபரிடம் இருந்தும் தலா 7 ஆயிரம் வீதம் தண்டப்பணம் அறவிடப்பட்டதாக அவர் மேலும் குறிப்பிட்டார்.

சந்தேக நபர்களில் வாச்சிக்குடா, தாண்டியடி ,விநாயகபுரம், பகுதியில் 4 சந்தேக நபர்களும்   கைதானதுடன் இதில் பியர் போத்தலை விற்பனைக்காக வைத்திருந்த குற்றச்சாட்டிற்காகவும் மற்றுமிருவர் கசிப்பு  வடித்தமை மற்றும் வடித்திருந்த கசிப்பை தம் வசம் வைத்திருந்தமை  மேலும் ஒரு சந்தேக நபர் கசிப்பு வடிப்பதற்கான மூலப்பொருளை வைத்திருந்த குற்றச்சாட்டு  தொடர்பாகவும் கைதாகியுள்ளனர்.