இலக்கியம் இலங்கை பிரதான செய்திகள்

பேரலைகளிடையே, கனவுப் பொதி – மயூரன் கவிதைகள்

 
கனவுப் பொதி
யாரும் கொண்டிராத கனவுப் பொதிக்கு
சொந்தக்காரர்கள்
நிகரற்ற தியாகத்தாலும்
விண்துளைத்த வீரத்தாலும்
உதிரத்தாலும் சிதைகளாலுமானது
அக்கனவுப் பொதி
பிரித்துப்பார்க்க எண்ணினேன்
முடியவில்லை
பிரித்துப்பார்க்கும் அருகதை எனக்கில்லை
அடி நெஞ்சில் மூண்ட தீயிலும்
ஆழியின் ஆழத்தை விஞ்சிய அர்ப்பணிப்பிலும்
உருப்பெற்றதல்லவா அக்கனவுகள்
மரிக்காத சகா ஒருவரிடம்
இன்னதை கேட்டிருந்தேன்
உள்ளிருப்பதை கூறிச்சென்றார்
அக்கனவுகளில் அவர்களில்லை
பச்சை வயல் வரப்பில்
நானும் என் தோழர்களும்
பட்டம் ஏற்றுகிறோம்
யாருமற்ற பெருவெளியில்
நடு இரவில்
தோழிகள் இருவர் நட்சத்திரங்களை கணக்கிடுகிறார்கள்.
– மயூரன் –
14.05.2017

பேரலைகளிடையே

உடைக்கப்பட்ட படகொன்றின்
சிதைவு துண்டுகளில்
நானும் உறவுகளும்
தத்தளித்தபடி இருக்கிறோம்

படகோ மிகப்பெரியது
படகைத்தாக்கிய அலைகளோ
படகை விடப்பெரியது

படகோட்டிகள் பலரும் மாண்டுவிட்டதாக சேதி
ஆனால் விளித்திரைகளில்
வந்துகொண்டுதான் இருக்கிறார்கள்

கடந்துவிட்ட அலைகள்
ஏராளம்
பெரும் அலைகள் எழுமெனத்தெரிந்தும்
படகு நிறுத்தப்படவில்லை
அவர்களிடம் உறுதி நிறையவே இருந்தது

கடந்துவந்த பாதையில்
அலைகளை கடக்கவும் கற்றுத்தந்திருக்கிறார்கள்
படகொன்றை கட்டவும் கற்றுத்தந்திருக்கிறார்கள்

நெடுந்தூரம் வந்துவிட்டோம்
மீதமுள்ள அலைகளை
கடக்கத்தான் வேண்டும்
‘கட்டப்படுகிறது , கடந்துகொண்டிருக்கிறது’
என்பதெல்லாம் ‘பொய்க்கதை’

இதுவரை பயணித்தவர் நாங்கள்
எமக்குத்தான் கட்டத்தெரியும்
எமக்குத்தான் கடக்கவும் தெரியும்
பேரலைகளிடையே சிதைவுத்துண்டுகளில்
படுத்துறங்கிவிட முடியாது

– மயூரன் –
10.11.2017

Add Comment

Click here to post a comment

Your email address will not be published. Required fields are marked *