முல்லைத்தீவில் மனித எச்சங்கள் காணப்படுகின்றன பகுதியில் எதிர்வரும் 6 ஆம் திகதி அகழ்வு பணிகளை முன்னெடுப்பதற்கு முல்லைத்தீவு மாவட்ட நீதிமன்ற நீதிபதி ரி.சரவணராஜா உத்தரவிட்டுள்ளார்.
நேற்று முன்தினம் (29.06.23) மாலை முல்லைத்தீவு மாவட்டத்தின் கொக்குத்தொடுவாய் மத்தி பகுதியில் தேசிய நீர்வழங்கல் வடிகாலமைப்பு சபையினர் நீர் இணைப்பினை மேற்கொள்வதற்காக கனரக இயந்திரம் கொண்டு நிலத்தினை தோண்டியபோது, நிலத்தில் புதைக்கப்பட்ட நிலையில் மனித எச்சங்கள் அடையாளம் காணப்பட்டன.
இந்த சம்பவத்தினை தொடர்ந்து கொக்கிளாய் காவற்துறையினருக்கு தகவல் வழங்கப்பட்டதை தொடர்ந்து கொக்குளாய் காவற்துறையினர் விசாரணைகளை முன்னெடுத்தனர் .
இது தொடர்பாக நேற்று (30.6.23) நீதிமன்றத்தில் அறிக்கை சமர்ப்பிக்கப்பட்ட நிலையில், நேற்று(30.06.23) மாலை 2.30 மணியளவில் முல்லைத்தீவு மாவட்ட நீதிமன்ற நீதிபதி ரி.சரவணராஜா குறித்த இடத்தை நேரில் சென்று பார்வையிட்டார்.
இதன்போது குறித்த மனித எச்சங்கள் காணப்படுகின்றன பகுதியில் எதிர்வரும் 6 ஆம் திகதி அகழ்வு பணிக்கு நீதிபதி உத்தரவிட்டதோடு, அதற்குரிய நபர்களுக்கான உரிய அறிவுறுத்தல்களை வழங்குமாறும் அதுவரை எச்சங்கள் அழிவடையாமால் பாதுகாக்குமாறும் கொக்கிளாய் காவற்துறையினருக்கு பணிப்பு விடுத்தார்.
பெண்களின் மேலாடை மற்றும் பச்சை சீருடை மற்றும் எலும்பு எச்சங்கள் என்பன இதன்போது இனம் காணப்பட்டுள்ளன. 1984 ஆம் ஆண்டு முதல் முழுமையான இராணுவக் கட்டுப்பாட்டில் உள்ள இந்தப் பகுதியில் இந்த தடையங்கள் மீட்கப்பட்டமை மக்களிடையே சந்தேகங்களை ஏற்படுத்தி உள்ளன. பெண் போராளிகள் கொல்லப்பட்டு புதைக்க்பட்டு இருக்கலாம் என்ற சந்தேகங்கள் எழுந்துள்ளன.
இந்நிலையில் , குறித்த பகுதிக்கு நீதிபதி வருகை சென்றபோது அங்கு மனித உரிமைகள் சட்டத்தரணி, முன்னாள் மாகாண சபை உறுப்பினர் துரைராசா ரவிகரன் ,சமூக செயற்ப்பாட்டாளர் பீற்றர் இழஞ்செழியன்,கிராம மட்ட அமைப்புக்களின் தலைவர்கள் கிராம மக்கள் உள்ளிட்ட பலர் பிரசன்னமாகியிருந்தனர்.
