එක්සත් අරාබි එමීර් රාජ්‍යයේ විදේශ කටයුතු සහ ජාත්‍යන්තර සහයෝගිතාව පිළිබඳ අමාත්‍ය ෂෙයික් අබ්දුල්ලා බින් සයේඩ් අල් නයන් මහතා සිය ආසියානු සංචාරයේ එක් පියවරක් වශයෙන් ඊයේ (18) ශ්‍රී ලංකාවට පැමිණියේය.
සිය සංචාරය අතරතුර අමාත්‍ය අල් නයන් මහතා ජනාධිපති මෛත්‍රීපාල සිරිසේන සහ අග්‍රාමාත්‍ය රනිල් වික්‍රමසිංහ යන මහත්වරුන් හමු වූ අතර විදේශ කටයුතු අමාත්‍ය තිලක් මාරපන මහතා සමඟ ද්විපාර්ශ්වීය සාකච්ඡා පැවැත්වීය.
ශ්‍රී ලංකාව සහ එක්සත් අරාබි එමීර් රාජ්‍යය අතර දේශපාලන කටයුතු, වෙළෙඳ කටයුතු සහ ආයෝජන අවස්ථා මෙම ද්විපාර්ශ්වික රැස්වීමේදී සාකච්ඡාවට බඳුන් කෙරිණි. දෙරට අතර සබඳතා තවදුරටත් පුළුල් කරන, සංස්කෘතික සහයෝගීතාව ශක්තිමත් කිරීම සහ එක්සත් අරාබි එමීර් රාජ්‍යයේ සේවය කරන ශ්‍රී ලාංකිකයන්ගේ රැකියා අපේක්ෂාවන් සම්බන්ධ මුලපිරීම් රැසකට අමාත්‍යවරු දෙපළ එකඟතාව පළ කළහ.
එක්සත් අරාබි එමීර් රාජ්‍යයේ ආයෝජකයන්ට ශ්‍රී ලංකාවේ ආයෝජනය කරන ලෙසට ශ්‍රී ලංකාව ඇරයුම් කළේය.
Add Comment