දිවයිනේ ප්‍රදේශ කිහිපයක සිදු වූ අනතුරුවලින් පුද්ගලයින් හතර දෙනෙකු ජීවිතක්ෂයට පත්ව තිබේ.
පෑලියගොඩ ප්‍රදේශයේදී යතුරුපැදියක් හා කන්ටේනර් රථයක් එකිනෙක ගැටීමෙන් සිඳුවූ අනතුරකින් බරපතල තුවාල ලැබූ යතුරුපැදිකරු කොළඹ ජාතික රෝහලට ගෙන යන අතරතුර ජීවිතක්ෂයට පත්ව තිබේ. අනතුර සම්බන්ධයෙන් කන්ටේනර් රථයේ රියදුරු අත්අඩංගුවට ගෙන තිබේ.
මීරිගම මීගමුව මාර්ගයේ තිඹිරිගස්කටුව ප්‍රදේශයේදී කැබ් රථයක වේගය පාලනය කරගත නොහැකිව එය මාර්ගයෙන් ඉවතට පැන අසල තිබූ බස් නැවතුම්පොළේ ගැටීමෙන් අනතුරක් සිඳුව තිබේ. එහිදී නැවතුම්පොළේ සිටි පුද්ගලයෙකු බරපතල තුවාල ලබා මීගමුව රෝහලට ඇතුළත් කරන අතරතුර ජීවිතක්ෂයට පත්ව තිබේ.
ජාඇල ඒකල කාර්මික ජනපදයේ මඩම හන්දිය ප්‍රදේශයේදී ත්‍රිරෝද රථයක් මාර්ගයේ ගමන් කරමින් සිටි කාන්තාවකගේ ගැටී ඇති අතර ඉන් බරපතල තුවාල ලැබූ කාන්තාව රෝහල්ගත කරන අතරතුර ජීවිතක්ෂයට පත්ව තිබේ.
මේ තඅර, වැල්ලවාය තණමල්විල මාර්ගයේ බුදුරුවගල පාලම අසලදී වේගය පාලනය කරගත නොහැකිවූ යතුරු පැදියක් මාර්ගයෙන් ඉවතට පැන පාලමේ ගැටීමෙන් බරපතල තුවාල ලැබූ යතුරුපැදිකරු වැල්ලවාය රෝහලට ඇතුලත් කර තිබේ. අනතුරුව වැඩිදුර ප්‍රතිකාර සඳහා මොනරාගල රෝහලට ඇතුළත් කළ ඔහු එහි ප්‍රතිකාර ලබමින් සිටියදීයි ජීවිතක්ෂයට පත්ව තිබේ.
Add Comment