தமது பூர்வீக நிலங்களை விடுவிக்கக் கோரி கேப்பாபுலவில் மக்கள் கவனயீர்ப்புப் போராட்டத்தில் ஈடுபட்டு வரும் நிலையில், வடக்கு முதல்வர் சி.வி. விக்கினேஸ்வரன் இன்று கேப்பாபுலவிற்கு சென்றுள்ளார். ஒரு தாயை பறித்துக் கொண்டு இன்னொரு பெண்ணை தருகிறேன், அதை தாயாக வைத்துக்கொள்ளுங்கள் என்று எப்படி கூற முடியாதோ அப்படித்தான் உங்கள் காணிகளை பறித்துவிட்டு வேறு காணிகளை வழங்க முடியாது என வடக்கு முதல்வர் மக்கள் மத்தியில் குறிப்பிட்டார்.
அத்துடன் உங்களின் போராட்டம் நியாயமானது என்றும் அதனை நிறுத்தச் சொல்ல மாட்டேன் என்றும் கூறிய அவர் வன்முறையற்ற நெருக்குதல் மூலம் இலக்கை அடைய வேண்டும் என்றும் தொடர்ந்து மக்கள் போராட வேண்டிய நிலைக்கு தள்ளப்பட்டுள்ளதாகவும் தெரிவித்தார்.
அரசாங்கத்திற்கு இராணுவத்தை வெளியேற்றும் எண்ணம் இல்லை என்று தெரிவித்த அவர், போராட்டத்தின் மூலமே காணிகளை பெற முடியும் என்றும் மக்கள் பிரதிநிதிகள் என்ற வகையில் அனைத்து தரப்பினருடனும் இது குறித்து பேசுவேன் என்றும் அவர் குறிப்பிட்டார்.
இலங்கை விமானப்படையின் தென்மேற்குப் பக்கத்தில் இரண்டாயிரம் ஏக்கர் காணிகளை இராணுவம் ஆக்கிரமித்துள்ளதாக தரவுகள் கிடைக்கப்பெற்றுள்ளதாகவும் அதனை அரசுக்கு தெரியப்படுத்திய போதும் எந்த நடவடிக்கையும் எடுக்கவில்லை என்றும் அவர் மேலும் குறிப்பிட்டார்.
