முன்னாள் அரச அதிபர் கணேசின் எழுச்சியும் வீழ்ச்சியும் ஓர் மீள்பதிவு…

யாழ்ப்பாணம் மற்றும் வவுனியா மாவட்டங்களில் யுத்த சூழலில் அரசாங்க அதிபராகப் பணியாற்றிய சிலரில் நீண்டகாலம் பணியாற்றிய பொலிகண்டியை பிறப்பிடமாகவும் கொழும்பு சொய்சாபுரத்தை வசிப்பிடமாகவும் கொண்ட கந்தையா கணேஷ் 10.05.2018 வியாழக்கிழமை அன்று யாழ்ப்பாணத்தில் காலமானார். இறுதிக் கிரியைகள் கிழவி தோட்டம், கரவெட்டியில் உள்ள அன்னாரது இல்லத்தில் 11.05.2018 ம் திகதி வெள்ளிக் கிழமை பி.ப .12.30 மணியளவில் நடைபெறவுள்ளது.

திரு கணேஸ் அவர்கள் யுத்தகாலத்தில் மேற்கொண்ட கடினமான பணிகள் யாழ்ப்பாணம் மற்றும் வவுனியா மாவட்ட மக்களாலும் தமிழ் மக்களாலும் மறக்கப்பட முடியாதவை. அவரது யுத்தபாலப் பணிகள் குறித்த மதிப்பீடுகள் உன்னதமானவை… எனினும் இந்த உன்னதங்களையும், சிறந்த பண்புகளையும், அர்ப்பணிப்புகளையும், தியாகங்களையும் கொண்ட அரச அதிகாரிகள் அரச போகங்களில் கிறங்கிப் போகும் பொழுது தமது தனித்துவத்தையும், அறத்தினையும் இழந்து பதவிகளுக்காகவும், பட்டங்களுக்காகவும் விழக்கூடாதவர்களின் கால்களில் வீழ்ந்து சரணாகதி அடையும் துர்ப்பாக்கியம் முள்ளிவாய்க்கால் பேரவலத்தின் பின், தோற்கடிக்கப்பட்ட போராட்டத்தின் பின் அரங்கேறி வருகிறது… அதற்கு அரச அதிபர் கணேசும் பலியாகிப் போனமை வேதனையானதே…

அவரின் மறைவின் போது இந்த விடயத்தை மீள ஞாபகப்படுத்துவது தேவைதானா? என்ற கேள்விகளிடையே 2010ஆம் ஆண்டு  ஜூலை 13ல் குளோபல் தமிழ்ச் செய்திகளில் வந்த இந்த செய்தியினை மீள்பதிவு செய்கிறோம். மறுக்கப்பட்ட உரிமைகளுக்காக போராடுகின்ற இனத்தில் இருந்து உயர் பதவிகளில் அமருகின்ற அதிகாரிகள் மட்டும் அல்ல, அனைத்து அதிகாரிகளின் பணிகளும் குறைந்தபட்சம் அறம்சார்ந்தவையாக அமைய வேண்டும்  அல்லவா….

ஆ.ர்

முன்னைய பதிவின் இணைப்பு…

யாழ்ப்பாண அரச அதிபர் கணேஸ் மேஜர் ஜெனரல் ஜீ ஏ சந்திரசிறியின் கால்களில் வீழ்ந்து ஆசீர்வாதம் பெற்ற காட்சிப் படம் குளோபல் தமிழ் செய்திகளுக்கு கிடைத்துள்ளது:‐

13 ஜூலை 2010

யாழ்ப்பாண அரச அதிபர் கணேஸ் யாழ் மாவட்ட முன்னாள் ராணுவத் தளபதியும் தற்போதைய வடக்கு மாகாண ஆளுனருமான மேஜர் ஜெனரல் ஜீ ஏ சந்திரசிறியின் கால்களில் வீழ்ந்து ஆசீர்வாதம் பெற்ற நிகழ்வின் ஒளிப்படம் குளோபல் தமிழ் செய்திகளுக்கு கிடைத்துள்ளது.

அரச அதிபர் கணேஸ் அரசாங்கத்தின் கால்களில் வீழ்ந்தே  தனது சேவைக்கால நீடிப்பினைப் பெற்றுக் கொண்டதாக அண்மையில் தமிழ்த் தேசிய கூட்டமைப்பின் நாடாளுமன்ற உறுப்பினர் சரவணபவன்   தெரிவித்திருந்தார்.

69 வயதைக் கடந்துள்ள யாழ் அரச அதிபர் கணேசின் சேவைக்காலம் மறுஅறிவித்தல் வரை மீண்டும் நீடிக்கப்பட்டமையானது பெரும் சர்ச்சைகளை ஏற்படுத்தியுள்ளது.

குறிப்பாக அரசின் ஆளும் உயர் மட்டத்தினரது கால்களில் விழுந்தே அவர் தனது  சேவைக்கால நீடிப்பைப் பெற்றுக் கொண்டதாக வெளியாகியுள்ள தகவல்கள் பலத்த விமர்சனங்களை ஏற்படுத்தி உள்ளன.

குளோபல் தமிழ் செய்திகளுக்கு கிடைத்துள்ள மிக இரகசியமான இந்தப் படத்தின் மூலம் ஏற்கனவே முன்வைக்கப்பட்ட குற்றச்சாட்டுகள் அம்பலமாகியுள்ளன.

யாழ்ப்பாண அரச அதிபர் தன்னிலும் மிகவும் வயது குறைந்த சந்திரசிறியின் கால்களில் விழுந்து ஆசிர்வாதம் வாங்கியதனையும் அரச உயர்மட்ட அதிகாரிகள் அதனை வரவேற்பதனையும் இந்தப் படத்தில் காணலாம்.

இதே வேளை யாழ் அரச அதிபர் தனது பதவி ஆசைக்காக ஆசனத்தை கட்டிக் கொண்டிருப்பதாக செயலக உள்ளுர் அதிகாரிகளே விமர்சிக்கத் தொடங்கியிருக்கின்றார்கள்.

முன்னதாக முல்லைத்தீவு மாவட்ட அரச அதிபர் இமெல்டா சுகுமார் யாழ்ப்பாணத்திற்கு மாற்றம் செய்யப்பட்டதாக அறிவிக்கப்பட்டிருந்த போதிலும் அவரது இடமாற்றம் அரசியல் காரணங்களால் தடுத்து நிறுத்தப்பட்டது. ஆனால் இன்று வரை பொதுநிர்வாக அமைச்சு தனக்கு வழங்கிய இடமாற்றத்தினை ரத்துச் செய்யவில்லை என இமெல்டா சுகுமார் தெரிவித்துள்ளார்.

 

பின்னூட்டங்கள்..

அனுப்புக Srilankan News