இறுதி யுத்தத்தில் கொல்லப்பட்டவர்கள் 5ஆயிரத்திற்கும் 6 ஆயிரத்திற்கும் இடைப்படவர்களே….

இலங்கைக்கு எதிரான பிரேரணையை மீளப் பெற்றுக் கொள்ளவேண்டும்…

மனித உரிமைகள் மீறல் சம்பந்தமாக இலங்கைக்கு எதிரான பிரேரணையை மீளப் பெற்றுக் கொள்வதற்கு ஐக்கிய அமெரிக்கா மற்றும் ஐக்கிய இராச்சியம் என்பன ஐ.நா. மனித உரிமைகள் ஆணைக்குழுவுக்கு அறிவிக்க வேண்டும் என பிரித்தானியாவின் பாராளுமன்ற உறுப்பினரான நெஸ்பி சாமி கூறியுள்ளார்.

இலங்கைத் தொலைக்காட்சி நிகழ்ச்சி ஒன்றில் கருத்து வெளியிட்ட அவர், “ஐக்கிய நாடுகள் சபையால் கூறுவது போன்று 40,000 பொது மக்கள் கொலை செய்யப்படவில்லை. சிலர் அந்தத் தொகை 100,000 இலட்சம் என்று ஐக்கிய நாடுகள் சபையில் கூறுகின்றனர். எனினும் தரவுகளின் படி அது 5000 முதல் 6000 வரை என்பதுவே சரியானதாக இருக்கும்.

இலங்கையில் இடம்பெற்றது என்ன என்பது சம்பந்தமாக அப்போதே நான் ஆர்வத்துடன் இருந்தேன். ஆம் அது ஒரு யுத்தம். எனினும் அங்கு கூறப்படுவது போன்று, சித்திரவதை இடம்பெற்றதாக நம்பத்தகுந்த விடயங்களை காண முடியவில்லை.

இலங்கை யுத்த செயற்பாடுகளில் ஈடுபட்ட காலத்திலேயே ஐக்கிய அமெரிக்கா மற்றும் ஐக்கிய இராச்சியம் என்பன அதிக மனிதாபிமான நடவடிக்கைகளை மேற்கொண்டன. அது தவறான விடயம் என்று நான் நினைக்கவில்லை.

இலங்கைக்கு எதிரான பிரேரணையை மீளப் பெற்றுக் கொள்ளவேண்டும் என,  ஐக்கிய அமெரிக்கா மற்றும் ஐக்கிய இராச்சியம் என்பவற்றிடம் நான் கோரியுள்ளேன். காரணம் இலங்கையர்களுக்கு இதில் சம்பந்தமில்லை.

நான் சர்வதேச செஞ்சிலுவை சங்கத்தின் மூன்று சிரேஷ்ட உறுப்பினர்களிடம் மூன்று சந்தர்ப்பங்களில் இந்த சித்திரவதை சம்பந்தமாக சாட்சிகள் இருக்கின்றதா என்று கேட்டிருக்கின்றேன். காரணம் அவர்கள் இலங்கையின் அனைத்து இடங்களிலும் இருக்கிறார்கள். எனினும் அந்த மூன்று சந்தர்ப்பங்களிலும் கிடைத்த பதில் இல்லை என்பதே. தேவையற்ற செயற்பாடுகள் இலங்கையில் ஒரளவுக்கு இருந்த போதிலும் கூறப்படுகின்ற அளவுக்கு சித்திரவதைகளை இடம்பெறவில்லை என்றே அவர்கள் கூறினர்.” என தெரிவித்துள்ளார்.