இலங்கை, தென்னாபிரிக்க அணிகளுக்கிடையிலான ஐந்து போட்டிகள் கொண்ட ஒருநாள் சர்வதேசப் போட்டித் தொடரின் நான்காவது போட்டி, இன்று பல்லேகலயில நடைபெறவுள்ளது. இத்தொடரின் முதல் மூன்று போட்டிகளிலும் வென்று ஏற்கனவே தென்னாபிரிக்கா தொடரை கைப்பற்றியுள்ள நிலையில் , இப்போட்டியில் எவ்வாறாவது வென்று விட வேண்டும் என்ற மனநிலையில் இலங்கை களமிறங்கும் என எதிர்பார்க்கப்படுகிறது.
இத்தொடரின் மூன்று போட்டிகளிலுமே உபுல் தரங்க, குசல் மென்டிஸ் ஆகியோர் பிரகாசிக்காதபோதும் குழாமில் வேறு துடுப்பாட்ட வீரர்கள் இல்லாத நிலையில் இவர்கள் இப்போட்டியிலும் விளையாடுவார்கள் என எதிர்பார்க்கப்படுகிறது. அதேவேளை காயம் காரணமாக தென்னாபிரிக்க அணியின் தலைவர் பப் டு பிளெஸி, இன்றைய மற்றும் அடுத்த ஒருநாள் போட்டியிலும் இருபதுக்கு – 20 சர்வதேசப் போட்டியிலும் விளையாட மாட்டார் என்கின்ற நிலையில் இன்றைய போட்டியில் குயின்டன் டி கொக் தென்னாபிரிக்க அணிக்கு தலைமை தாங்குவார் என்பது குறிப்பிடத்தக்கது
