புதையலில் தோண்டப்பட்ட கறுப்பு தங்கத்துடன் ஒருவர் கைது

புதையல் அகழ்வில் தோண்டி எடுக்கப்பட்ட தங்கம் என கூறி   விற்பனை செய்ய முயன்ற சந்தேக நபர்  கல்முனை   விசேட அதிரடிப்படையினரால்  கைது செய்யப்பட்டுள்ளார்.

அம்பாறை மாவட்டம் திருக்கோவில்  காவல்துறைப் பிரிவிற்குட்பட்ட   கோரக்களப்பு குளத்திற்கருகில்  தகவல் ஒன்றிற்கு அமைய சம்பவ தினமான  வெள்ளிக்கிழமை(19) மாலை கல்முனை  விசேட அதிரடிப்படையினரால்  இக்கைது சம்பவம் இடம்பெற்றுள்ளது.

24 வயதுடைய கோமாரி பகுதியை சேர்ந்த சந்தேக நபர் கைது செய்யப்பட்டுள்ளதுடன் சந்தேக நபர் வசம் இருந்து ரூபா 20 இலட்சம் பெறுமதியான  350 துண்டுகள் அடங்கிய  113 கிராம் 180 மில்லி கிராம்  எடையுடைய ஒரு தொகுதி   கறுப்பு பொன்நிற கற்கள் கல்முனை விசேட அதிரடிப்படையினரால் மீட்கப்பட்டுள்ளது.

இந்நடவடிக்கையானது விசேட அதிரடிப்படையின் கட்டளை அதிகாரி பிரதி காவல்துறை மா அதிபர் வருண ஜெயசுந்தரவின் பணிப்புரைக்கமைய முன்னெடுக்கப்பட்டது.

கைது செய்யப்பட்ட நபர் சான்று பொருட்களுடன் திருக்கோவில்   காவல்துறையினரிடம் விசேட அதிரடிப்படையினர் நீதிமன்ற நடவடிக்கைக்காக பாரப்படுத்தியமை குறிப்பிடத்தக்கது.