பொன். அருணாச்சலத்தின் தண்ணொளிர்வில்… அல்லது நினைவு நூற்றாண்டு 2024ல்; நல்லது வேண்டும்!

சமுத்திரம் சூழ்ந்த முத்து
அழகிய இலங்கைத் தீவு
நல்விதை அழித்து
நாசவிதை வளர்த்த
நவீன
அநாகரீக அரசியல்
வெடித்துச் சிதறி
இலங்கைத் தீவைப்
பற்றியது
இனவாதப் பெருநெருப்பு

இன்னமும்
எரித்தெரித்து
இனவாதச் சிந்தனைகளில்
குளிர் காயும் அரசியல்
எழுதப்படாத யாப்பாக
கொலு வீற்றிருந்து அழிக்கிறது

சமுத்திரம் சூழ்ந்த முத்து
அழகிய இலங்கைத் தீவு
பசுமை வளத்தின் நிலப்பரப்பு
ஊதியூதி அணையவிடாப்
பெருநெருப்பில்
இன்னமும்
எரிந்தபடி
எரித்தபடி
ஆழப் புதைத்து
அகழப்படாது

ஆயினும் சிறு ஊற்றாய்
இன்னமும் சுரந்தபடி
மெய்யறிவு

பொன்.அருணாச்சலத்தின்
நினைவுகளை மீட்டலில்
மீளக் கொணர்தலில்
சிறு ஊற்றின் பெருக்கெடுப்பு
கொடுந்தீ அணைக்கும்

சமுத்திரம் சூழ்ந்த முத்து
அழகிய இலங்கைத் தீவு
பசுமை வளத்தின் நிலப்பரப்பில்
அதன் மக்கள் ஆனந்தக் கூத்தாடுவர்

சி.ஜெயசங்கர்