169
குழந்தைகள் பந்தையகுதிரைகள் அல்லர்
வெற்றிக் கம்பங்களை நோக்கி
விரசித்துரத்துவதற்கு
குழந்தைகள் எடுத்தாடும் காவடிகள் அல்லர்
குதித்தாடி குரவைப் போட்டு
நேர்ச்சை வைப்பதற்கு
குழந்தைகள் காட்சிப்பொருட்கள் அல்லர்
ஏற்றி எடுத்து
காட்டாப்புக் காட்டுவதற்கு
குழந்தைகள் இறப்பர்பந்துகள் அல்லர்
திக்குகள் எங்கும்
எறிந்தெறிந்து விளையாடுவதற்கு
குழந்தைகள் கற்பனை பறவைகள் அல்லர்
பெரியவர் எண்ணங்களை
ஏற்றிப் பறக்க வைப்பதற்கு
குழந்தைகள் ஆய்வுக்கூட உயிரிகள் அல்லர்
இரசாயனங்களில் வளர்வதற்கு
குழந்தைகள் முழுமனிதர்களாகும்
உயிர் மூச்சுக் கொண்ட மனித முளைகள்
குழந்தைகள் இயல்பாய் வளரும் மூலிகைகள்
மூலிகைகள் அறிவோம்
மூலிகை இயல்புகள் அறிவோம்
இயற்கையின் வீரியங்களென குழந்தைகள் வளர்க
சி.ஜெயசங்கர்
Spread the love
