இலங்கை கடற்படையால் சிறைபிடிக்கப்பட்ட 27 மீனவர்களையும் ஐந்து விசைப்படகு களையும் உடனடியாக விடுதலை செய்ய வலியுறுத்தி ராமேஸ்வரம் தபால் தந்தி அலுவலகம் முன்பு இன்று புதன்கிழமை(18) காலை பாதிக்கப்பட்ட மீனவர்களும், மீனவ சங்க அமைப்புகளும் ஆர்ப்பாட்டம் நடத்தினர்.
கடந்த 14ஆம் தேதி இலங்கை கடற்படையால் சிறைபிடிக்கப்பட்ட ராமேஸ்வரம் மற்றும் மண்டபம் பகுதி மீனவர்களையும்,படகுகளையும், விடுதலை செய்ய வலியுறுத்தி இன்று ராமேஸ்வரம் தபால் தந்தி அலுவலகம் முன்பு ராமேஸ்வரம்- மதுரை தேசிய நெடுஞ்சாலையில் சிறைபிடிக்கப்பட்ட மீனவ குடும்பங்கள் மீனவர் சங்கப் பிரதிநிதிகள் மீன்பிடி சார்பு தொழிலாளர் என நூற்றுக்கும் மேற்பட்டோர் கண்டன ஆர்ப்பாட்டம் நடத்தினர்.
ஆர்ப்பாட்டத்தில் கச்சத்தீவை மீட்டு கொடு, கச்சத்தீவு பகுதியில் இழந்த மீன்பிடி உரிமையை மீட்டெடுக்கவும்,இலங்கை கடற்படையால் தாக்குதலுக்கு உண்டான படகுகளுக்கு முழு நிவாரணம் வழங்க வேண்டும்,இலங்கை கடற்படையால் பறிமுதல் செய்யப்பட்ட நூற்றுக்கு மேற்பட்ட விசைப் படகளுக்கு முழுமையான நிவாரணம் வழங்க மத்திய மாநில அரசுகள் தீர்மானம் நிறைவேற்றி நிவாரண வழங்க வேண்டும் ,தொடர்ச்சியாக தமிழக மீனவர்கள் மீது தாக்குதல் மற்றும் கைது நடவடிக்கையில் ஈடுபடும் இலங்கை கடற்படையினரை யும்,இலங்கை அரசுக்கு எதிராகவும், கோஷங்கள் எழுப்பப்பட்டது.
போராட்டத்தில் ஈடுபட்டவர்கள் கூறும் போது, இன்று நடைபெற இருந்த பாம்பன் சாலை மறியல் போராட்டத்தை அரசு அதிகாரிகளின் வேண்டுகோளுக்கிணங்க இன்று ராமேஸ்வரம் தபால் தந்தி அலுவலகம் முன்பு கண்டன ஆர்ப்பாட்டமாக மாற்றப்பட்ருந்தது. அதேபோல் வரும் 27ஆம் திகதி மீனவர்களையும் விசைப்படகுகளை யும் விடுதலை செய்து தருவதாக அரசு சார்பில் அரசு அதிகாரிகள் உத்தரவாதம் அளித்துள்ளனர்.
