⚖️ இந்தியாவில்  கைது செய்யப்பட்ட யாழ். குற்றவாளிகள்   இலங்கைக்கு அழைத்து வரப்பட்டு விசாரணை!

இந்தியாவில் கைது செய்யப்பட்ட, இலங்கையில் பல்வேறு பாரிய குற்றச்செயல்களுடன் தொடர்புடைய இரண்டு சந்தேகநபர்கள் இலங்கைக்கு அழைத்து வரப்பட்டு தற்போது தீவிர விசாரணைக்கு உட்படுத்தப்பட்டு வருகின்றனர்.

யாழ்ப்பாணத்தைச் சேர்ந்த இரண்டு முக்கிய சந்தேகநபர்களே இவ்வாறு இந்திய அதிகாரிகளால் கைது செய்யப்பட்டு, பின்னர் இலங்கை காவல்துறையினாிடம் ஒப்படைக்கப்பட்டுள்ளனர். யாழ்ப்பாணம், உடுப்பிட்டி பகுதியைச் சேர்ந்த குணசீலன் பிரகாஷ் மற்றும் யாழ்ப்பாணம், மானிப்பாய் பகுதியைச் சேர்ந்த குணசேகர் தேவ சுதன் ஆகியோரே இவ்வாறு கைது செய்யப்பட்டவா்கள் ஆவா்.

இவர்கள் இருவரும் தற்போது மத்திய குற்றப் புலனாய்வுப் பணியகத்தின் (CCIB) பொறுப்பில் உள்ளனர். இவர்களுக்கெதிராகப் பெறப்பட்ட தடுப்புக்காவல் உத்தரவின் கீழ் மேலதிக விசாரணைகள் ஆரம்பிக்கப்பட்டுள்ளன.

விசாரணையில் கொழும்பு, கொட்டாஞ்சேனை மற்றும் யாழ்ப்பாணத்தில் அண்மைக்காலமாக இடம்பெற்ற பல துப்பாக்கிச் சூட்டுச் சம்பவங்களுக்கு இவர்கள் உடந்தையாக இருந்துள்ளமை தெரியவந்துள்ளது.

அத்துடன் திட்டமிட்ட குற்றச் செயல்களில் ஈடுபடும் கும்பலைச் சேர்ந்த பழனி ரெமுஷன் (Palani Remushan) என்பவரது குற்றச் செயல்களுக்கு இவர்கள் ஆதரவு வழங்கியுள்ளதாகவும் காவல்துறையினா் சந்தேகிக்கின்றனர்.

இந்தியாவில் இருந்து அழைத்து வரப்பட்ட பிரகாஷ் மற்றும் தேவ சுதன் ஆகியோரிடம் முன்னெடுக்கப்பட்ட முதற்கட்ட விசாரணைகளில், இலங்கையின் வடக்கு மற்றும் மேல் மாகாணங்களில் இயங்கும் பாதாள உலக வலையமைப்பு குறித்த பல அதிர்ச்சித் தகவல்கள் கிடைத்துள்ளன.

பழனி ரெமுஷன் தற்போது வெளிநாட்டிலிருந்து (பெரும்பாலும் பிரான்ஸ் அல்லது மத்திய கிழக்கு நாடுகளில் இருந்து) தனது குற்றச் செயல்களை இயக்குவதாக காவல்துறையினா் சந்தேகிக்கின்றனர்.
இக்கும்பல் போதைப்பொருள் கடத்தல் மற்றும் மிரட்டி பணம் பறித்தல் (Extortion) மாத்திரமன்றி, ஒப்பந்தக் கொலைகளையும் (Contract Killing) முன்னெடுத்து வருகிறது.

யாழ்ப்பாணத்தில் உள்ள இளைஞர்களைக் குறிவைத்து, அவர்களுக்குப் பணம் மற்றும் வெளிநாட்டு வேலைவாய்ப்பு ஆசை காட்டித் தனது கும்பலில் இணைத்துக் கொள்வதில் பழனி ரெமுஷன் கைதேர்ந்தவர்.

இந்தியா-இலங்கை இடையிலான கடல் மார்க்கமாக கேரளா கஞ்சா மற்றும் ‘ஐஸ்’ (Ice) போதைப்பொருள் கடத்தலுக்கு இந்தச் சந்தேகநபர்கள் உதவியுள்ளனர். கொட்டாஞ்சேனை பகுதியில் நடத்தப்பட்ட துப்பாக்கிச் சூடுகளுக்குத் தேவையான நவீன ரகத் துப்பாக்கிகளை விநியோகிப்பதில் இவர்களுக்கு நேரடித் தொடர்பு உள்ளது.’உண்டியல்’ மற்றும் ‘ஹவாலா’ முறைகள் மூலம் குற்றச் செயல்களுக்கான பணத்தை இவர்கள் பரிமாற்றம் செய்துள்ளனர்.

பழனி ரெமுஷனை சர்வதேச காவல்துறையின் (Interpol) உதவியுடன் கைது செய்து இலங்கைக்குக் கொண்டு வருவதற்கான ‘சிவப்பு அறிவித்தல்’ (Red Notice) பிறப்பிப்பது குறித்து காவல்துறை தலைமையகம் ஆலோசித்து வருகின்றது.

Tag Words: #CrimeLKA #CCIB #Extradition #JaffnaNews #UnderworldLKA #PoliceInvestigation #BreakingNews2026 #SriLankaJustice