உலகம் முழுவதும் மற்றும் அண்டை நாடான இந்தியாவில் பரவி வரும் நிபா வைரஸ் (Nipah Virus) அச்சுறுத்தல் காரணமாக, இலங்கை சுகாதாரத் துறை எடுத்துள்ள முன்னெச்சரிக்கை நடவடிக்கைகள் குறித்து சுகாதார அமைச்சர் வைத்தியர் நலிந்த ஜயதிஸ்ஸ இன்று (பிப்ரவரி 10, 2026) விசேட விளக்கமளித்துள்ளார்.
இந்தியாவின் மேற்கு வங்க மாநிலத்தில் நிபா வைரஸ் தொற்றுகள் உறுதி செய்யப்பட்டதைத் தொடர்ந்து, இலங்கை தனது கண்காணிப்பு நடவடிக்கைகளை உச்சகட்டத்திற்கு உயர்த்தியுள்ளது.
கட்டுநாயக்க உள்ளிட்ட சர்வதேச விமான நிலையங்களில் வருகை தரும் பயணிகள் தீவிரமாகத் கண்காணிக்கப்படுகின்றனர். குறிப்பாக, காய்ச்சல் மற்றும் சுவாசப் பிரச்சினைகளுடன் வருபவர்கள் மீது விசேட அவதானம் செலுத்தப்படுகிறது.
2026 ஜனவரியில் மட்டும் 277,000 சுற்றுலாப் பயணிகள் வந்துள்ளனர் (இது ஒரு சாதனை அளவு). கடந்த 4 நாட்களில் மட்டும் 40,000 பேர் வந்துள்ளனர். இவ்வளவு பெரிய எண்ணிக்கையிலான வருகையால் தொற்று பரவும் அபாயம் அதிகம் என்பதால் கண்காணிப்பு பலப்படுத்தப்பட்டுள்ளது.
அத்துடன் கொழும்பில் நடைபெறவுள்ள இந்தியா – பாகிஸ்தான் இடையிலான கிரிக்கெட் போட்டியைப் பார்க்க அதிகளவான இந்தியப் பயணிகள் வருவார்கள் என எதிர்பார்க்கப்படுவதால், சுகாதாரத் துறை கூடுதல் எச்சரிக்கையுடன் உள்ளது.
“இது கொவிட்-19 தொற்றை விடவும் மிகவும் ஆபத்தானது” என வைத்தியர் நலிந்த ஜயதிஸ்ஸ எச்சரித்துள்ளார். இந்த வைரஸால் பாதிக்கப்படுபவர்களில் 40% முதல் 75% வரை உயிரிழக்க வாய்ப்புள்ளது. வௌவால்கள், பன்றிகள் மூலம் மனிதர்களுக்குப் பரவும் இந்த வைரஸ் பாதிக்கப்பட்ட ஒருவரிடமிருந்து இன்னொருவருக்கும் மிக வேகமாகப் பரவக்கூடியது . கடுமையான காய்ச்சல், தலைவலி, மூச்சுத்திணறல் மற்றும் மூளை அழற்சி (Encephalitis) போன்றவை இதன் அறிகுறிகளாகும்.
தற்போது வரை இலங்கையில் நிபா வைரஸ் தொற்று எதுவும் கண்டறியப்படவில்லை. இருப்பினும், வெளிநாடுகளில் இருந்து வருபவர்கள் அல்லது அவர்களுடன் தொடர்பில் இருப்பவர்கள் காய்ச்சல் போன்ற அறிகுறிகள் தென்பட்டால் உடனடியாக மருத்துவ ஆலோசனையைப் பெறுமாறு கேட்டுக்கொள்ளப்பட்டுள்ளனர்.
Tag Words: #NipahVirus #SriLankaHealth #NalindaJayatissa #AirportScreening #PublicHealth2026 #IndiaPakistanCricket #TravelSafety #LKA
