மும்பையில் 24 வயதுடைய நிகழ்ச்சி தொகுப்பாளினி அடுக்குமாடி குடியிருப்பின் 2வது மாடியில் இருக்கும் குழாயில் பிணமாக தொங்கியது கண்டுபிடிக்கப்பட்டுள்ளது. நிகழ்ச்சி தொகுப்பாளினியான, மும்பையை சேர்ந்த 24 வயதுடைய அர்பிதா திவாரி, அண்மையில் தனது காதலர் பங்கஜ் ஜாதவுடன் சேர்ந்து விளம்பர நிறுவனம் ஒன்றை ஆரம்பித்ததாகவும், விரைவில் இருவருக்கும் திருமணம் நிகழ இருந்ததாகவும் தெரிவிக்கப்படுகிறது. இந்த நிலையில் அர்பிதா தனது காதலருடன் சேர்ந்து மானவ்ஸ்தல் ஹைட்ஸ் என்ற 19 அடுக்குமாடி குடியிருப்புக்கு சென்றுள்ளார்.
அடுக்குமாடி குடியிருப்பில் வசிக்கும் நண்பரை சந்திக்க அதிகாலை 3 மணிக்கு அர்பிதாவும், ஜாதவும் சென்றுள்ளார். அவர்களின் நண்பர் 15வது மாடியில் வசித்து வருகிறார். 4 மணிக்கு அனைவரும் தூங்கியுள்ளனர். காலை 7 மணிக்கு எழுந்த ஜாதவ் பாத்ரூமுக்கு சென்றபோது அது உள்புறமாக பூட்டியிருந்ததால் அவர் மீண்டும் வந்து படுத்து தூங்கிவிட்டார்.
மீண்டும் எழுந்து வந்தபோதும் பாத்ரூம் பூட்டியிருந்ததால் சாவி போட்டு திறந்து பார்த்தனர். பாத்ரூம் ஜன்னலின் கண்ணாடியை எடுத்து தரையில் வைத்திருந்ததை அவதானித்துள்ளனர். அர்பிதாவை வீட்டில் காணாமல் இருவரும் தேடினர். அதன்போது அர்பிதா 2வது மாடியின் குழாயில் பிணமாகத் தொங்கியது தெரிய வந்தது. அரை நிர்வாணமாக கிடந்தார். அவர் தங்கியிருந்த வீட்டில் இருந்து மதுப்போத்தல்கள் பறிமுதல் செய்யப்பட்டன. அவர் தானாக குதித்தாரா?, தவறி விழுந்தாரா? கொலையா என்பது பற்றி தகவல்கள் வெளியாகவில்லை இது குறித்து போலீசார் விசாரணை நடத்தி வருகிறார்கள்.
