படுகொலை செய்யப்பட்ட எஸ்போஸின் படைப்புகள் மற்றும் அவர் பற்றிய நூல் வெளியிடப்பட்டது

ஊடகவியலாளராகவும் படைப்பாளியாகவும் இயங்கிய எஸ்போஸ் 2007 ஆம் ஆண்டு வவுனியாவில் உள்ள அவருடைய வீட்டில் வைத்து, அவருடைய ஏழு வயது மகனின் முன்னே இனங்காட்டத் தைரியமற்றவர்களால் சுட்டுக்கொல்லப்பட்டார்.

அவருடைய ஆவணங்கள், படைப்புகள், ஒளிப்படங்கள் என அனைத்தையும் கொலையாளிகள் எடுத்துச் சென்றிருந்தனர். மிஞ்சிய படைப்புகளையும் பிற இடங்களில் ஏற்கனவே பிரசுரமாகியிருந்த படைப்புகளையும்  தயாளன், சித்தாந்தன், கருணாகரன் ஆகியோர் தேடித் தொகுத்திருக்கின்றனர்.

இதேவேளை இந்த நூலில் எஸ்போஸ் பற்றி பல்வேறு ஆளுமைகள் எழுதியிருக்கும் பதிவுகளும் விமர்சனங்களும் இடம்பெற்றிருக்கின்றன.இந்த நூலினை வடலி பதிப்பகம் வெளியிட்டுள்ளது.

இதனுடைய வெளியீட்டு நிகழ்வு நாளை கிளிநொச்சியில் பெ. கணேசன் தலைமையில் நடைபெறுகிறது. தொடக்க உரையை ப. தயாளன் ஆற்றுகிறார். இந்த நிகழ்வில் எஸ்போஸின் தாயார் மற்றும் சகோதரர், சகோதரி ஆகியோர் கலந்து கொள்கின்றனர். நூல் பற்றிய விமர்சன உரையை கிரிஷாந் நிகழ்த்துகிறார்.எஸ்போஸ் பற்றிய உரைகளை நிரஞ்சலன், திருநகரூர் ஜெகா, ஜோயல் பியசீலன், பொன் காந்தன், ரகுநாதன், அன்ரன் அன்பழகன் ஆகியோர் ஆற்றுகின்றனர்.