குளோபல் தமிழ்ச் செய்தியாளர்
பண்டத்தரிப்புப் பகுதியில் ஐஸ் போதைப் பொருளை வைத்திருந்த குற்றச்சாட்டில் ஒருவர் வட்டுக்கோட்டைக் காவல்துறையினரால் கைது செய்யப்பட்டுள்ளார். குறித்த போதைப்பொருள் யாழ்ப்பாணத்தில் முதன்முறையாகக் கைப்பற்றப்பட்டுள்ளது என்று காவல்துறையினர் தெரிவித்தனர். இந்தச் சம்பவம் நேற்று வியாழக்கிழமை இடம்பெற்றது.
‘வட்டுக்கோட்டை காவல்துறையினருக்குக் கிடைத்த இரகசிய தகவலின் அடிப்படையில் பண்டத்தரிப்பு இலங்கை வங்கிக்கு அருகாமையில் வைத்து அதே பகுதியைச் சேர்ந்த ஒருவரிடம் விசாரணைகள் முன்னெடுக்கப்பட்டதனையடுத்து அவரிடமிருந்து ஐஸ் எனப்படும் அதி சக்தி வாய்ந்த போதைப்பொருள் 85 கிராம் மீட்கப்பட்டது.
அதனை விற்பனைக்காக வைத்திருந்த குற்றச்சாட்டில் சந்தேகநபர் கைது செய்யப்பட்டார். இந்த வகைப் போதைப்பொருள் முதன் முதலாக யாழ்ப்பாணத்தில் கைப்பற்றப்பட்டுள்ளது.
சந்தேகநபர் தொடர்பான விசாரணைகளை வட்டுக்கோட்டை பொலிஸார் மேற்கொண்டு வருகின்றனர். விசாரணைகளின் பின்னர் சந்தேகநபர் மல்லாகம் நீதிவான் நீதிமன்றத்தில் முற்படுத்தப்படுவார்’ என்று காவல்துறையினர் தெரிவித்தனர்.
