அடுத்தடுத்து, கவனத்தை ஈர்க்கும் வகையிலான திரைப்படங்களில் தொடர்ந்து நடித்து வரும் மக்கள் செல்வன் விஜய் சேதுபதி விவசாயத்தை மையப்படுத்தி உருவாக உள்ள திரைப்படமொன்றில் நடிக்க உள்ளார்.
விஜய் சேதுபதி நடிப்பில் கடைசியாக வெளியான ஒரு நல்ல நாள் பார்த்து சொல்றேன் படம் நல்ல வரவேற்பை பெற்றிருந்த நிலையில் அவர் தற்போது, 96, சூப்பர் டீலக்ஸ், ஜுங்கா, சீதக்காதி, சயீரா நரசிம்ம ரெட்டி, டிராபிக் ராமசாமி, செக்க சிவந்த வானம் உள்ளிட்ட படங்களில் நடித்து வருகிறார். ரஜினியின் அடுத்த படத்திலும் நடிக்க ஒப்பந்தமாகியிருக்கிறார்.
இந்நிலையில், விஜய் சேதுபதி அடுத்ததாக விவசாயம் சம்பந்தப்பட்ட கதை ஒன்றிலும் நடிக்க உள்ளார். அந்த படத்தை ஆண்டவன் கட்டளை படத்தை இயக்கிய மணிகண்டன் இயக்க இருப்பதாக தகவல் வெளியாகி இருக்கிறது.
மேலும் அந்த படத்திற்கு கடைசி விவசாயி என்று தலைப்பு வைக்கப்பட்டுள்ளது. விவசாயம், விவசாயிகளை மையப்படுத்தி உருவாகும் இந்த படத்தில் விஜய் சேதுபதி விவசாயியாக நடிக்கிறாராம். விவசாயத்தின் அவசியத்தை உணர்த்தும் படமாக நகைச்சுவை கலந்த திரைக்கதை அமைக்க மணிகண்டன் முடிவு செய்துள்ளதாக கூறப்படுகிறது.
இந்த படம் குறித்த அதிகாரப்பூர்வ தகவல் விரைவில் வெளியாகும் என்று எதிர்பார்க்கப்படுகிறது.
