மூன்று காவல்துறை உயர்அதிகாரிகள் விசாரணைக் களத்தில்

யாழ்ப்பாணம் – வட்டுக்கோட்டை  காவல்  நிலையத்தில் கடமையாற்றும் காவல்துறைஉத்தியோகத்தர்கள் ஒரு சிலரால் மேற்கொள்ளப்பட்டுள்ள விரும்பத்தகாத செயற்பாடு தொடர்பில் மூன்று  காவல்துறை உயர் அதிகாரிகள் அடங்கிய விசாரணை குழுவினால், விசாரணைகள் முன்னெடுக்கப்படுவதாக யாழ்ப்பாணம் மாவட்ட பிரதி காவல்துறைமா அதிபர் மஞ்சுள ஜெனரத் தெரிவித்துள்ளார்.

வட்டுக்கோட்டைகாவல்துறையினரினால் சித்தங்கேணி பகுதியைச் சேர்ந்த நாகராசா அலெக்ஸ் (வயது 24) எனும் இளைஞன் கைது செய்யப்பட்டு சித்திரவதைக்குட்படுத்தப்பட்ட நிலையில் உயிரிழந்துள்ளதாக வெளியாகியுள்ள செய்திகள் தொடர்பில் கேட்ட போதே அவ்வாறு தெரிவித்தார். மேலும் தெரிவிக்கையில்,

 குறித்த சம்பவம் தொடர்பில் விசாரணைகளை நடத்துவதற்காக யாழ்ப்பாண  காவல்துறைப்பிரிவுக்குட்பட்ட உதவி  காவல்துறை  அத்தியட்சகர், காங்கேசன் துறை காவல்துறை பிரிவுக்குட்பட்ட உதவி காவல்துறை அத்தியட்சகர் மேலும் யாழ்ப்பாண மாவட்ட குற்றத்தடுப்பு காவல்துறை பிரிவின் பொறுப்பதிகாரி அடங்கிய குழுவினர் விசாரணைகளை மேற்கொண்டு வருகின்றனர்.

 விசாரணைகளின் அடிப்படையில் வட்டுக்கோட்டை  காவல்துறை பிரிவில் கடமையாற்றும் நான்கு உத்தியோகத்தர்கள் குறித்த சம்பவத்துடன் தொடர்புபட்டுள்ளார்கள் என இனங்காணப்பட்டதன் அடிப்படையில் அவர்கள் நால்வரும் தற்பொழுது மாவட்ட குற்றத்தடுப்பு  காவல்துறை பிரிவின் கட்டுப்பாட்டில் உள்வாங்கப்பட்டு விசாரணைகள் மேற்கொள்ளப்படுகின்றன.  விரைவில் குறித்த சம்பவத்துடன் தொடர்புடையவர்கள் கைது செய்யப்பட்டு சட்டத்தின் முன் நிறுத்தப்படுவார்கள்.

அதேவேளை இந்த விடயம் தொடர்பில்  காவல்துறைமா அதிபரினாலும் எமக்கு உரிய நடவடிக்கையை மேற்கொள்ளுமாறு அறிவுரை வழங்கப்பட்டுள்ளது.  அத்துடன் தற்பொழுது வட்டுக்கோட்டை  காவல்துறை  நிலையத்தில் கடமையாற்றிய நான்கு உத்தியோகத்தர்கள் இடமாற்றப்பட்டுள்ளார்கள்.

அவர்கள் அங்கு கடமையாற்றினால், அங்குள்ள ஆவணங்கள் மற்றும் சாட்சிகளை அழித்து விடுவார்கள் என்ற காரணத்தினால் அவர்களை இடம் மாற்றி விசாரணைக்குட்படுத்தப்பட்டுள்ளார்கள்.  எனவே இந்த விடயம் தொடர்பில் பொதுமக்கள் குழப்பமடையத் தேவையில்லை. காவல்துறை உயர் மட்டத்தில் விசாரணைகளை விரைவாக செயற்படுத்துமாறு பணித்துள்ளோம் என தெரிவித்தார்.