பச்சிளம் குழந்தையை தூக்கி வீசி சுன்னாகம் காவல்துறையினா் அட்டகாசம்

யாழ்ப்பாணம் சுன்னாகம் பகுதியில் தமது வாகனத்தில் குடும்பத்தினர் பயணித்துக்கொண்டிருந்த வேளை , அவர்களது வாகனத்தை மோட்டார் சைக்கிளில் முந்தி சென்றவர்கள் வாகனத்திற்கு முன்பாக தடுமாறி விழுந்து விபத்துக்கு உள்ளாகியுள்ளனர்.  அதனை அடுத்து சம்பவ இடத்திற்கு சிவில் உடையில்  சென்ற காவல்துறையினா்  , வாகன சாரதியுடன் முரண்பட்டு , அவரை தாக்கியுள்ளனர்.

அதன்போது வாகனத்தில் இருந்த அவரது மனைவி இரண்டு மாதங்களேயான தனது குழந்தையுடன் இறங்கி கணவன் மீது தாக்குதல் நடாத்தியவர்களை தடுக்க முற்பட்ட வேளை அவரது கையில் இருந்த குழந்தையை பறித்து எறிந்து தாயையும் தாக்கியுள்ளனர்.

அதனை அடுத்து சம்பவ இடத்தில் பொதுமக்கள் கூடியதும் , சீருடையில் வந்த  காவல்துறையினா்  வாகனத்தையும் வாகனத்தில் இருந்தவர்களையும் வாகனத்துடன்  காவல்  நிலையம் அழைத்து சென்று , தாக்குதலுக்கு இலக்கானவர்களை கைது செய்தனர்.

சம்பவம் தொடர்பில் பாதிக்கப்பட்டவரின் மனைவி தெரிவிக்கையில்,

நாங்கள் வாகனத்தில் பயணித்துக்கொண்டிந்த வேளை , மோட்டார் சைக்கிளில் பயணித்த இருவர் எம்மை முந்தி சென்று விபத்துக்கு உள்ளானர்கள். அவர்கள் மதுபோதையில் இருந்தமையால் , நாங்களும் வாகனத்தை நிறுத்தி விட்டு , இருந்தோம்.

அப்போது சிவில் உடையில் வந்தவர்கள் எனது கணவரிடம் சாரதி அனுமதி பத்திரம் , வாகன ஆவணங்களை கேட்டிருந்தனர். சிவில் உடையில் உள்ள உங்களுக்கு அதனை காண்பிக்க தேவையில்லை. விபத்து நடந்துள்ள இடத்திற்கு போக்குவரத்து பிரிவு காவல்துறையினரை வரவழையுங்கள் என கூறினார்.

அதற்கு சிவில் உடையில் வந்திருந்தவர்கள் எனது கணவனை மூர்க்க தனமாக தாக்கினார்கள். அதனை தடுக்க சென்ற என்னையும் தாக்கி , எனது இரண்டு மாத குழந்தையையும் , என் கையில் இருந்து பிடுங்கி எறிந்தனர்.  பின்னர் சீருடையில் வந்த  காவல்துறையினா்  வாகனத்தை காவல் நிலையம் எடுத்து சென்றதுடன் எனது கணவரையும் கைது செய்துள்ளனர் என தெரிவித்தார்.

அதேவேளை சம்பவ இடத்திற்கு சென்ற சட்டத்தரணி மணிவண்ணன் , பார்த்தீபன் உள்ளிட்டோர் , பாதிக்கப்பட்ட தரப்பினருக்கு ஆதரவாக நின்றிருந்தனர்.  சட்டத்தரணி மணிவண்ணன் , பொலிஸ் நிலையத்தினுள் சென்று கைது செய்யப்பட்டிருந்தவரை பார்வையிட்டு , சம்பவம் தொடர்பில் நேரில் கெடடறிந்து கொண்டார்.

அதேவேளை ஜனாதிபதி அநுர குமார திஸாநாயக்க தேர்தல் பரப்புரைக்காக இன்றைய தினம் ஞாயிற்றுக்கிழமை யாழ்ப்பாணத்திற்கு  செல்லவுள்ளார்.  சுன்னாகம்  காவல்து நிலையத்தின் புதிய அலுவலகமானது நேற்றைய தினம்  சனிக்கிழமை இலங்கை பதில் காவல்துறை  மா அதிபர் பிரியந்த வீரசூரியவினால் திறந்து வைக்கப்பட்டு சில மணி நேரங்களில் இந்த சம்பவம் இடம்பெற்றுள்ளமை குறிப்பிடத்தக்கது.