இந்தியாவின் மிகவும் விலை மதிப்பு மிக்க பிரபலமானவர்கள் பட்டியல் ஆண்டுதோறும் வெளியிடப்படுகிறது. பன்னாட்டு மதிப்பு மற்றும் விளம்பரம் மூலம் அவர் சேர்க்கும் பணம் ஆகியவற்றின் அடிப்படையில் ஆய்வு செய்து இந்த பட்டியல் வெளியிடப்படும்.
2017-ம் ஆண்டுக்கான விலை மதிப்புமிக்க பிரபலமானவர்கள் பட்டியலில் விராட் கோலி முதலிடத்தை பிடித்தார். அவர் பொலிவுட்டின் பிரபலமான ஷாருக்கானை முந்தினார்.
விராட் கோலியின் விலை மதிப்பு இந்த ஆண்டில் 923 கோடி இந்திய ருபா என கணிப்பிடப்பட்டுள்ளது. கிரிக்கெட்டின் 3 நிலைகளிலும் (டெஸ்ட், ஒருநாள் போட்டி, 20 ஓவர்) அவரது ஆட்டம் மிகவும் சிறப்பாக இருந்தது.
இதனால் கடந்த ஆண்டு முதலிடத்தில் இருந்த ஷாருக்கானை அவர் இந்த ஆண்டில் பின்னுக்கு தள்ளி முதலிடத்தை பிடித்திருக்கிறார். 2016-ம் ஆண்டு விலை மதிப்பில் கோலி 2-வது இடத்தில் இருந்தார். விலை மதிப்பு பிரபலமானவர்கள் பட்டியலில் ஷாருக்கான் 2-வது இடத்தில் உள்ளார். அவரது மதிப்பு 679 கோடி இந்திய ரூபாய் ஆகும்.
நடிகை தீபிகா படுகோனே 595 கோடி இந்திய ரூபாய் மதிப்புடன் 3-வது இடத்திலும், அக்ஷய் குமார் 301 கோடி இந்திய ரூபாய் மதிப்புடன் 4-வது இடத்திலும், ரன்விர்சிங் 269 கோடி ரூபாய் மதிப்புடன் 5-வது இடத்திலும், சல்மான்கான் 250 கோடி ரூபாய் மதிப்புடன் 6-வது இடத்திலும் உள்ளனர்.
இந்திய அணியின் முன்னாள் அணித் தலைவர் டோனியின் விலை மதிப்பு 134 கோடி ரூபாய் ஆகும். 2014-ம் ஆண்டில் அவரது மதிப்பு அதிகபட்சம் 460 கோடி ரூபாயாக இருந்தமை குறிப்பிடத்தக்கது.
