அந்தப் பழைய வாழ்க்கை
ஈரலிப்புடன் இன்னும் நினைவுகளில்
மீண்டும் அதை வாழ்ந்துவிடும் அங்கலாய்ப்பு
நினைவுகளில் கிளர்ந்து கிளர்ந்து
வலியும் மகிழ்வுமாக
உடல் குளிர்ந்து
வெளியறியா துக்கத்தில் விறைத்தபடி
முகம் சிரித்து
புத்தியால் உடல் நகர்த்தி
பெயர்ந்து பெயர்ந்து
புதுப்புது வாழ்க்கை
கைகளை விட்டுப்போன
ஆட்டுக்குட்டிகளை துரத்திப் பிடிப்பதான
வாழ்க்கை
துன்பகரமான அலைக்கழிவுகளில்
புதையுண்டுபோகும் துயரம்
புதிய மனிதர்
புதிய சூழல்
புதிய புதிய நிலவுருக்கள்
அதில் வாழும் உயிரினங்கள்
வாகனங்கள் சனசந்தபடி இரைச்சல்
நெஞ்சில் ஒட்டாத இசையாய்
வழுக்கிச் சென்றபடி
உடலில் பட்டாலும்
உள்ளத்தில் ஒட்டாத காற்று
நெஞ்சம் கனத்து
தொண்டைக் குழியுள் புற்றெடுத்திருக்கும்
கக்கிவிடவும் விழுங்கிவிடவும் முடியாத் துயரம்
நம்பிக்கையை வலிந்து கண்டுபிடித்து
மகிழ்ச்சி காணும் வாழ்க்கை
வாகனப் பயணத்தில்
கண்ணில் பட்டுக் கடந்து மறைந்து போகும்
காட்சிகளான
பெயர்வு வாழ்க்கை
யதார்த்த நிலவுருவின் சலனம் கிழித்து
மிளிரும் நினைவின் நிலவுருக்கள்
முகங்கள் குரல்கள்
பாதைகள் படலைகள்
முற்றங்கள் மரங்கள் மணங்கள்
மறக்க முடியாத கோபதாபங்கள்
கொண்டாட்டங்கள்
மறக்க முடியாதபடிக்கு
நெஞ்சம் கனக்க
கொட்டிக் கழுவி முடியாதபடிக்கு
தலைக்குள் ஒரு வாழ்க்கை
மிதித்து நடக்கும் பாதங்களில்
ஒட்டாத பெயர்வு வாழ்க்கை
உடலை உள்ளத்தை ஈடாட வைக்கும்
துயரம்
ஒரு வாழ்க்கை
சந்ததிகளும் உணரமுடியாப்
பெருந்துயரம்
மனதுக்குள் பொத்திக் கொண்டு…
வரலாற்றின்
வலைவீச்சில் சிக்கிக்கொள்ளும்
சில சந்ததிகளின் துயரம்
எமக்கும் உரியதாயிற்று
உலகப் புலம்பெயர்வுகளே
வரலாற்றின் புலப்பெயர்வுகளே
உரத்துக் குரல் கொடுப்போம்
வேண்டாம்
இனியொரு சந்ததிக்கு
இந்த வாழ்க்கை
எங்களின் விருப்பிற்குரிய இடங்களில்
எல்லோரும் வாழ்வோம்
எல்லோரும் எல்லாமும் வாழும்
இந்த அழகிய பூவுலகில்
சி.ஜெயசங்கர்
