சந்தேகநபருடன் காவல்துறை புலனாய்வு அதிகாரி – காவல்துறையினா் ர் தீவிர விசாரணை

யாழ்ப்பாணத்தில் உள்ள நீதிமன்றங்களில் வழக்கு விசாரணைகள் நிலுவையில் உள்ள நிலையில், வழக்கு தவணைகளுக்கு சமூகம் அளிக்காததால் , பிடியாணை பிறப்பிக்கப்பட்ட நபருடன் ,  காவல்துறை  புலனாய்வு பிரிவு அதிகாரி ஒருவர் தங்கியிருந்த சம்பவம் தொடர்பில்  காவல்துறையினர் விசாரணைகளை முன்னெடுத்துள்ளனர்.

யாழ்ப்பாணம் நாயன்மார்கட்டு பகுதியில் , வன்முறை சம்பவங்களுடன் தொடர்புடைய குற்றச்சாட்டில் யாழ்ப்பாணத்தில் உள்ள நீதிமன்றங்களில் வழக்குகள் நிலுவையில் உள்ள சந்தேக நபர் ஒருவர் மீது நேற்று முன்தினம் புதன்கிழமை வன்முறை கும்பல் ஒன்று வாள் வெட்டு தாக்குதலை மேற்கொண்டுள்ளது . காரில் வந்த கும்பல் ஒன்றே தாக்குதலை நடாத்தி விட்டு தப்பி சென்றுள்ளது.

தாக்குதலில் காயமடைந்த இளைஞன் சிகிச்சைக்காக யாழ்.போதனா வைத்தியசாலையில் அனுமதிக்கப்பட்டுள்ள நிலையில், யாழ்ப்பாண  காவல்துறையினர் தீவிர விசாரணைகளை முன்னெடுத்துள்ளனர்.

விசாரணைகளின் போது , தன்னுடன்  காவல்துறை  புலனாய்வு பிரிவை சேர்ந்த உத்தியோகஸ்தரும் இருந்த வேளையில்தான் தன் மீது தாக்குதல் மேற்கொள்ளப்பட்டதாக ,தாக்குதலுக்கு இலக்கான இளைஞன் தெரிவித்துள்ளார்.

அந்நிலையில் , வன்முறை சம்பவங்களுடன் தொடர்புடைய குற்றச்சாட்டில் நீதிமன்றங்களில் வழக்குகள் நிலுவையில் உள்ள , பிடியாணை பிறப்பிக்கப்பட்ட சந்தேக நபருடன் , புலனாய்வு உத்தியோகஸ்தர் உடன் இருந்த சம்பவம் தொடர்பில்  காவல்துறை  உள்ளக விசாரணைகள் ஆரம்பிக்கப்பட்டுள்ளதாக  காவல்துறை தகவல்கள் தெரிவிக்கின்றன.