ரஷ்யா மற்றும் உக்ரைன் நாடுகளுக்கு இடையிலான போர் ஆரம்பமாகி நான்கு ஆண்டுகள் நிறைவடையவுள்ள நிலையில், இரு தரப்பிலும் உயிரிழந்தோர் மற்றும் காயமடைந்தோரின் மொத்த எண்ணிக்கை விரைவில் 20 லட்சத்தை (2 மில்லியன்) எட்டும் என புதிய அறிக்கை ஒன்று எச்சரித்துள்ளது.
அமெரிக்காவை தளமாகக் கொண்ட Center for Strategic and International Studies (CSIS) நிறுவனம் அண்மையில் வெளியிட்ட ஆய்வறிக்கையிலேயே இந்த அதிர்ச்சிகரமான தகவல்கள் வெளியாகியுள்ளன.
2026 ஆம் ஆண்டின் வசந்த காலத்திற்குள் (Spring), போரில் கொல்லப்பட்டவர்கள், காயமடைந்தவர்கள் மற்றும் காணாமல் போனவர்களின் மொத்த எண்ணிக்கை 20 லட்சத்தை எட்டும் என மதிப்பிடப்பட்டுள்ளது.
2022 பெப்ரவரி முதல் 2025 டிசம்பர் வரை ரஷ்யா சுமார் 12 லட்சம் (1.2 மில்லியன்) பாதிப்புகளைச் சந்தித்துள்ளது. இதில் சுமார் 3,25,000 உயிரிழப்புகள் அடங்கும். இது இரண்டாம் உலகப் போருக்குப் பிந்தைய எந்தவொரு பெரிய போரிலும் ஒரு நாடு சந்தித்த மிக உயர்ந்த இழப்பாகக் கருதப்படுகிறது.
அதேவேளை உக்ரைன் தரப்பில் சுமார் 5 லட்சம் முதல் 6 லட்சம் வரை பாதிப்புகள் ஏற்பட்டுள்ளதாக மதிப்பிடப்பட்டுள்ளது. இதில் உயிரிழந்தவர்களின் எண்ணிக்கை 1,40,000 வரை இருக்கலாம் என அந்த அறிக்கை கூறுகிறது.
இவ்வளவு பெரிய மனித உயிரிழப்புகளுக்கு மத்தியிலும், ரஷ்யாவின் நிலப்பரப்பு ஆக்கிரமிப்பு வேகம் மிகக் குறைவாகவே உள்ளது. ரஷ்யப் படைகள் ஒரு நாளைக்கு சராசரியாக 15 முதல் 70 மீட்டர் வரை மட்டுமே முன்னேறுவதாகக் குறிப்பிடப்பட்டுள்ளது.
எனினும் கிரெம்ளின் ஊடகப் பேச்சாளர் டிமிட்ரி பெஸ்கோவ் இந்த அறிக்கையை நிராகரித்துள்ளதுடன், இது “நம்பகமான தகவல் அல்ல” என்று கூறியுள்ளார்.
உக்ரைன் தரப்பிலிருந்து இந்த அறிக்கை குறித்து உடனடி உத்தியோகபூர்வ கருத்துக்கள் எதுவும் இதுவரை வெளியாகவில்லை.
நீண்ட இடைவெளிக்குப் பிறகு, 2026 ஜனவரி மாத இறுதியில் ஐக்கிய அரபு அமீரகத்தின் அபுதாபியில் (Abu Dhabi) அமெரிக்கா, ரஷ்யா மற்றும் உக்ரைன் ஆகிய நாடுகள் பங்குபற்றிய ஒரு முக்கியமான முத்தரப்புச் சந்திப்பு நடைபெற்றது.
டொனால்ட் ட்ரம்ப் நிர்வாகத்தின் முன்னெடுப்பில், அமெரிக்கப் பிரதிநிதிகள் ஜாரெட் குஷ்னர் (Jared Kushner) மற்றும் ஸ்டீவ் விட்காஃப் (Steve Witkoff) ஆகியோர் இந்த பேச்சுவார்த்தைகளை ஒருங்கிணைத்தனர்.
முதற்கட்ட பேச்சுவார்த்தைகள் “ஆக்கபூர்வமாக” இருந்ததாக உக்ரைன் ஜனாதிபதி ஸெலென்ஸ்கி தெரிவித்தார். இதன்தொடர்ச்சியாக, பெப்ரவரி 1-ஆம் திகதி இரண்டாம் கட்டப் பேச்சுவார்த்தைகள் நடைபெறவுள்ளன.
உக்ரைனின் மின் கட்டமைப்புகள் மீதான ரஷ்யத் தாக்குதல்கள் தொடர்வது அமைதி முயற்சியில் பெரும் தடையாக உள்ளது. நிலப்பரப்பு விட்டுக் கொடுப்பு (Territorial Concessions) தொடர்பாக இரு நாடுகளும் இன்னும் ஒருமித்த கருத்துக்கு வரவில்லை.
நான்கு ஆண்டுகாலப் போர் உலகப் பொருளாதாரத்தில் ஆழமான வடுக்களை ஏற்படுத்தியுள்ளது. உக்ரைன் மற்றும் ரஷ்யா உலகின் 25% கோதுமை ஏற்றுமதியைக் கொண்டுள்ளன. போர் காரணமாக சமையல் எண்ணெய், கோதுமை மற்றும் பார்லி ஆகியவற்றின் விலை சுமார் 20% வரை உயர்ந்துள்ளது, இது ஆபிரிக்க மற்றும் ஆசியாவின் வளரும் நாடுகளைப் பெரும் உணவுப் பஞ்சத்தில் தள்ளியுள்ளது.
அத்துடன் ஐரோப்பாவிற்கான ரஷ்ய எரிவாயு விநியோகம் தடைப்பட்டதால், ஐரோப்பிய நாடுகளில் மின்சாரக் கட்டணம் மற்றும் எரிபொருள் விலை உச்சத்தைத் தொட்டுள்ளது. இது ஐரோப்பிய தொழிற்சாலைகளின் உற்பத்தியைப் பாதித்து, பெரும் பொருளாதார மந்தநிலையை (Recession) நோக்கிய அச்சத்தை ஏற்படுத்தியுள்ளது.
உலக நாடுகள் ரஷ்யாவுக்கு ஆதரவான மற்றும் எதிரான அணிகளாகப் பிரிந்து வர்த்தகம் செய்வதால், திறந்த வர்த்தகக் கொள்கை பாதிக்கப்பட்டு “நட்பு நாடுகளுடனான வர்த்தகம்” (Friend-shoring) என்ற புதிய போக்கு உருவாகியுள்ளது.
நேட்டோ (NATO) நாடுகள் தமது மொத்த உள்நாட்டு உற்பத்தியில் (GDP) 5% வரை இராணுவச் செலவுகளுக்காக ஒதுக்க வேண்டிய கட்டாயத்திற்குத் தள்ளப்பட்டுள்ளன, இது சமூக நலத்திட்டங்களுக்கான நிதியைக் குறைத்துள்ளது.
Tag Words: #RussiaUkraineWar #WarCasualties #CSISReport #HumanCost #GlobalConflict #MilitaryLosses #LKA #BreakingNews2026 #Geopolitics #PeaceForUkraine
