🍵 பெருந்தோட்டத் தொழிலாளர்களுக்கு நாளாந்த சம்பளம் 1,750 ரூபாவாக உயர்வு –  ஒப்பந்தம் கைச்சாத்து

இலங்கை பெருந்தோட்டத் துறை வரலாற்றில் ஒரு மைல்கல்லாக, தோட்டத் தொழிலாளர்களின் நீண்டகால கோரிக்கையான சம்பள உயர்வு இன்று உத்தியோகபூர்வமாக உறுதிப்படுத்தப்பட்டுள்ளது. கொழும்பிலுள்ள பெருந்தோட்ட மற்றும் சமூக உட்கட்டமைப்பு வசதிகள் அமைச்சில் வைத்து இன்று (ஜனவரி 30, வெள்ளிக்கிழமை) காலை இந்த வரலாற்றுச் சிறப்புமிக்க ஒப்பந்தம் கையெழுத்திடப்பட்டது.

தற்போதைய 1,350 ரூபாயிலிருந்து 400 ரூபாய் அதிகரிக்கப்பட்டு 1,750 ரூபாவாக அதிகாிக்கப்பட்டுள்ளது. இந்த அதிகாிப்பில் தோட்ட நிறுவனங்கள் (RPCs)  200 ரூபாயும் அரசாங்கம் 200 ரூபாயும் (ஜனாதிபதியின் 2026 வரவு – செலவுத் திட்ட யோசனைப்படி) பங்களிப்பு செய்கின்றன.

இந்த ஒப்பந்தம் கையெழுத்திடப்பட்டதைத் தொடர்ந்து, வரும் மாதத்திலிருந்தே தொழிலாளர்கள் இந்த அதிகரித்த சம்பளத்தைப் பெற்றுக்கொள்ள வழிவகை செய்யப்பட்டுள்ளது.

கடந்த காலங்களில் 1,700 ரூபாய் கோரிக்கைக்காகத் தொழிலாளர்கள் தொடர் போராட்டங்களை முன்னெடுத்து வந்தனர். தற்போதைய அரசாங்கம், தொழிலாளர்களின் வாழ்வாதாரத்தைக் கருத்திற்கொண்டு, தனியார் நிறுவனங்களுடன் பேச்சுவார்த்தை நடத்தி, அரசாங்கத்தின் பங்களிப்பையும் சேர்த்து இந்த 1,750 ரூபாய் தீர்வை எட்டியுள்ளது.

1,750 ரூபாய் சம்பளத்தைப் பெறுவதற்கு, தொழிலாளர்கள் ஒரு நாளைக்குத் தீர்மானிக்கப்பட்ட குறைந்தபட்ச கொழுந்து அளவை (Target weight) பறிக்க வேண்டும் என்ற நிபந்தனையைப் பிராந்திய தோட்ட நிறுவனங்கள் (RPCs) முன்வைத்துள்ளன.

தீர்மானிக்கப்பட்ட அளவை விட மேலதிகமாகப் பறிக்கப்படும் ஒவ்வொரு கிலோ கொழுந்துக்கும் வழங்கப்படும் ‘மேலதிக கிலோ கொடுப்பனவு’ (Over-kilo rate) உயர்த்தப்படவுள்ளது. இது சுறுசுறுப்பாக வேலை செய்யும் தொழிலாளர்கள் ஒரு நாளைக்கு 2,000 ரூபாய்க்கும் மேல் சம்பாதிக்க வழிவகுக்கும்.

அரசாங்கம் வழங்க ஒப்புக்கொண்டுள்ள 200 ரூபாய் பங்களிப்பு, தொழிலாளர்களின் நம்பிக்கை நிதியங்கள் (EPF/ETF) கணக்கீடு செய்யப்படுவதையும் உறுதிப்படுத்தும் வகையில் சட்டக் கட்டமைப்பு உருவாக்கப்பட்டுள்ளது.

சம்பள உயர்வுடன் மேலதிகமாக, தோட்டத் தொழிலாளர் குடியிருப்புகளுக்கான மின்சாரம் மற்றும் குடிநீர் வசதிகளை மேம்படுத்தும் பணிகளுக்காக 2026 வரவு – செலவுத் திட்டத்தில் தனி நிதி ஒதுக்கப்பட்டுள்ளது.

தோட்ட நிறுவனங்கள் இந்தச் சம்பள உயர்வை ஏற்றுக்கொண்டாலும், உலகச் சந்தையில் தேயிலையின் விலை வீழ்ச்சியடைந்தால் அரசாங்கம் தங்களுக்கு வரிச் சலுகை வழங்க வேண்டும் என்ற கோரிக்கையை முன்வைத்துள்ளன.

Tag Words: #EstateWorkers #SalaryIncrease #1750LKR #SriLankaEconomy #TeaPlanters #SocialInfrastructure #Budget2026 #LKA #BreakingNews2026 #WorkersRights