ஹொங்கொங் ஜனநாயகப் போராட்டத்தின் அடையாளமாகத் திகழும் ஊடக ஜாம்பவான் ஜிம்மி லாய் (Jimmy Lai)-க்கு, அந்நாட்டு நீதிமன்றம் இன்று (பெப்ரவரி 9, 2026) 20 ஆண்டுகள் சிறைத்தண்டனை விதித்துள்ளது. ஹொங்கொங்கின் தேசிய பாதுகாப்புச் சட்டத்தின் கீழ் வழங்கப்பட்டுள்ள மிகக் கடுமையான தண்டனைகளில் இதுவும் ஒன்றாகும்.
சீனாவினால் விதிக்கப்பட்ட தேசிய பாதுகாப்புச் சட்டத்தின் கீழ், வெளிநாட்டு சக்திகளுடன் கூட்டுச் சேர்ந்து சதி செய்தமை மற்றும் தேசத்துரோகமான கருத்துக்களை வெளியிட்டமை ஆகிய குற்றச்சாட்டுகளின் அடிப்படையில் இந்தத் தண்டனை வழங்கப்பட்டுள்ளது.
78 வயதான ஜிம்மி லாய்-க்கு மொத்தம் 20 ஆண்டுகள் சிறைத்தண்டனை விதிக்கப்பட்டுள்ளது. அவரது வயது மற்றும் உடல்நிலையைக் கருத்தில் கொள்ள வேண்டும் என்ற கோரிக்கையை நீதிமன்றம் நிராகரித்துள்ளது.
ஜிம்மி லாய் இந்தச் சதிகளின் “முக்கிய மூளையாக” (Mastermind) செயல்பட்டதாகவும், வெளிநாடுகளுடன் இணைந்து சீனா மற்றும் ஹொங்கொங் மீது பொருளாதாரத் தடைகளை விதிக்கத் தூண்டியதாகவும் நீதிபதிகள் தெரிவித்தனர்.
இவருக்கு மேலதிகமாக அப்பிள் டெய்லி (Apple Daily) பத்திரிகையின் முன்னாள் ஊழியர்கள் அறுவர் மற்றும் இரண்டு ஆர்வலர்களுக்கு 6 முதல் 10 ஆண்டுகள் வரையிலான சிறைத்தண்டனை விதிக்கப்பட்டுள்ளது.
78 வயதான ஒருவருக்கு 20 ஆண்டுகள் சிறை என்பது அவர் சிறையிலேயே இறப்பதற்கான வாய்ப்பை (Effective Death Sentence) அதிகப்படுத்தியுள்ளதாகவும் இது “மரண தண்டனைக்கு நிகரானது” எனவும் மனித உரிமை அமைப்புகள் கவலை தெரிவித்துள்ளன.
“எனது தந்தை ஒரு தியாகியாகச் சிறைக்குள் மடிவார்” என அவரது மகள் உருக்கமாகத் தெரிவித்துள்ளார்.
அமெரிக்க ஜனாதிபதி டொனால்ட் ட்ரம்ப் மற்றும் பிரித்தானிய பிரதமர் கீர் ஸ்டார்மர் ஆகியோர் ஏற்கனவே இந்த வழக்கைக் கண்டித்துள்ளதுடன், பிரித்தானிய பிரஜையான ஜிம்மி லாயை விடுவிக்கக் கோரியுள்ளனர்.
தீர்ப்பு வழங்கப்படுவதற்கு சில நாட்களுக்கு முன்பிருந்தே, கடும் குளிரையும் பொருட்படுத்தாமல் நூற்றுக்கணக்கான மக்கள் நீதிமன்றத்திற்கு வெளியே வரிசையில் காத்திருந்தனர். “நாங்கள் உங்களுடன் இருக்கிறோம்” என்பதை ஜிம்மி லாய்க்கு உணர்த்துவதே அவர்களின் நோக்கமாக இருந்தது.
“ஹொங்கொங்கில் இனி செய்திகள் எதுவுமில்லை, அப்பிள் டெய்லியும் பறிபோய்விட்டது” என ஆதங்கப்படும் மக்கள், இப்போது சமூக வலைதளங்கள் மற்றும் யூடியூப் ஊடாகவே தகவல்களைப் பெறுகின்றனர்.
தீர்ப்பு வாசிக்கப்பட்டதும், 78 வயதான ஜிம்மி லாய் புன்னகையுடன் தனது ஆதரவாளர்களைப் பார்த்து கையசைத்தார். அவரது மனைவி மற்றும் ஆதரவாளர்கள் பலர் நீதிமன்றத்திலேயே கண்ணீர் விட்டு அழுதனர்.
Tag Words: #JimmyLai #HongKongNews #NationalSecurityLaw #PressFreedom #AppleDaily #FreeJimmyLai #BreakingNews2026 #LKA
