🍎  அமெரிக்காவின் மத்திய வர்த்தக ஆணையம்  அப்பிள் நிறுவனத்திற்கு  எச்சரிக்கை

அமெரிக்காவின் மத்திய வர்த்தக ஆணையம் (FTC), அப்பிள் (Apple) நிறுவனத்திற்கு மிக முக்கியமான எச்சரிக்கை கடிதம் ஒன்றை இன்று (2026, பெப்ரவரி 12) அனுப்பியுள்ளது.  அப்பிள் நிறுவனத்தின் செய்தித் தளமான ‘Apple News’, அரசியல் ரீதியாக ஒருதலைப்பட்சமாகச் செயல்படுவதாகக் கூறி FTC தலைவர் ஆண்ட்ரூ பெர்குசன் (Andrew Ferguson) இந்த எச்சரிக்கையை விடுத்துள்ளார்.

அப்பிள் நியூஸ் தளம், முற்போக்கு (Liberal) ஊடகங்களுக்கு அதிக முக்கியத்துவம் அளிப்பதாகவும், பழமைவாத (Conservative) ஊடகங்களின் செய்திகளை இருட்டடிப்பு செய்வதாகவும் குற்றஞ்சாட்டப்பட்டுள்ளது.

‘Media Research Center’ (MRC) என்ற அமைப்பு நடத்திய ஆய்வின்படி, கடந்த ஜனவரி மாதம் அப்பிள் நியூஸின் முக்கியச் செய்திகளில் (Morning Editions) ஒரு வலதுசாரி ஊடகச் செய்தி கூட இடம்பெறவில்லை எனச் சுட்டிக்காட்டப்பட்டுள்ளது. அப்பிள் நிறுவனம் தனது விதிமுறைகளில் செய்திகளை நடுநிலையாகத் தொகுப்பதாகக் கூறிவிட்டு, நடைமுறையில் அவ்வாறு செய்யத் தவறினால் அது ‘நுகர்வோர் பாதுகாப்புச் சட்டத்தை’ (FTC Act) மீறுவதாக அமையும் என பெர்குசன் எச்சரித்துள்ளார்.

அமெரிக்க அதிபர் டொனால்ட் டிரம்ப், அப்பிள் நியூஸின் இந்த ஒருதலைப்பட்சமான போக்கு குறித்து ‘Truth Social’ தளத்தில் அதிருப்தி வெளியிட்ட மறுதினமே இந்த எச்சரிக்கை வந்துள்ளது.

சில காலங்களுக்கு முன்னர் அப்பிள் சிஇஓ டிம் குக் (Tim Cook), டிரம்ப் நிர்வாகத்துடன் இணக்கமாகச் செயல்படுவதாக உறுதியளித்திருந்த நிலையில், தற்போது ஏற்பட்டுள்ள இந்த மோதல் தொழில்நுட்ப உலகில் பரபரப்பை ஏற்படுத்தியுள்ளது.

அப்பிள் நிறுவனம் தனது செய்தித் தொகுப்பு முறைகளை (Content Curation) மறுஆய்வு செய்ய வேண்டும் எனவும் அரசியல் சார்புநிலை இருந்தால் அதனை உடனடியாகச் சரிசெய்து, அனைத்துத் தரப்புச் செய்திகளுக்கும் சமமான வாய்ப்பளிக்க வேண்டும் எனவும் குறிப்பிடப்பட்டுள்ளது.

இந்த கடுமையான எச்சரிக்கையைத் தொடர்ந்து, அ ப்பிள் நிறுவனம் இதுவரை விரிவான அதிகாரப்பூர்வ அறிக்கை எதனையும் வெளியிடவில்லை என்றாலும், அதன் செய்தித் தொடர்பாளர்கள் மற்றும் கடந்தகால விளக்கங்கள் மூலம் சில முக்கிய விடயங்களை முன்வைத்துள்ளது:

அப்பிள் நியூஸ் தளம் ஒரு அல்காரிதம் (Algorithm) மூலம் மட்டும் இயங்குவதில்லை, மாறாக, அனுபவம் வாய்ந்த ஊடகவியலாளர்களைக் கொண்ட ஒரு குழுவே செய்திகளைத் தெரிவு செய்கிறது. இந்தத் தெரிவு “செய்தியின் தரம், உண்மைத்தன்மை மற்றும் நம்பகத்தன்மை” ஆகியவற்றின் அடிப்படையிலேயே அமைகிறதே தவிர, அரசியல் சார்புநிலை அல்ல என அப்பிள் வாதிடுகிறது.

அப்பிள் நியூஸ் தளத்தில் பயனர்கள் தங்களுக்குப் பிடித்தமான ஊடகங்களை (வலதுசாரி அல்லது இடதுசாரி) பின்தொடரவோ அல்லது பிடிக்காதவற்றைத் தவிர்க்கவோ (Block) முழு சுதந்திரம் உள்ளது. எனவே, நிறுவனம் யாரையும் கட்டாயப்படுத்துவதில்லை என்பதே அவர்களின் வாதம்.

அப்பிள் நியூஸ் தளத்தில் 3000-க்கும் மேற்பட்ட பல்வேறு அரசியல் பார்வைகளைக் கொண்ட ஊடகங்கள் இணைக்கப்பட்டுள்ளதாக அப்பிள் சுட்டிக்காட்டுகிறது.
FTC தலைவர் ஆண்ட்ரூ பெர்குசன், அப்பிள் நிறுவனம் தனது ‘செய்தி தொகுப்பு கொள்கைகளை’ (Curation Policies) உடனடியாக மறுஆய்வு செய்ய வேண்டும் என வலியுறுத்தியுள்ளார்.

“நாங்கள் நடுநிலையானவர்கள்” என்று அப்பிள் கூறினால், அதன் முகப்புப் பக்கத்தில் (Morning Editions) அனைத்து அரசியல் சார்பு செய்திகளும் சமமாக இடம்பெற வேண்டும்.

ஒருவேளை ஆப்பிள் ஒரு குறிப்பிட்ட கருத்தியலுக்கு மட்டும் முக்கியத்துவம் அளிப்பதாக இருந்தால், அதைத் தனது பயனர் விதிமுறைகளில் (Terms of Service) வெளிப்படையாகக் கூற வேண்டும். இல்லையெனில் அது “மறைமுகமான ஏமாற்று வேலை” (Deceptive Practice) எனக் கருதப்படும் என FTC தலைவர் ஆண்ட்ரூ பெர்குசன் தொிவித்துள்ளாா்

தற்போதைய FTC எச்சரிக்கைக்கும் அப்பிள் நியூஸ் சந்தா விலைக்கும் நேரடித் தொடர்பு இல்லை என்றாலும், மறைமுகமான சில மாற்றங்கள் ஏற்பட வாய்ப்புள்ளது

Tag Words: #AppleNews #FTCWarning #TechBias #TimCook #AndrewFerguson #USPolitics2026 #MediaCensorship #LKA