146
தெற்கு லெபனானின் கடலோர நகரமான டயரில், கடந்த ஏப்ரல் 3 மற்றும் 4 ஆகிய திகதிகளுக்கு இடைப்பட்ட இரவு வேளையில் இஸ்ரேல் நடத்திய வான்வழித் தாக்குதலில் லெபனான்-இத்தாலிய வைத்தியசாலை (Lebanese-Italian Hospital) பலத்த சேதமடைந்துள்ளது. லெபனான் பொது சுகாதார அமைச்சு மற்றும் வைத்தியசாலை நிர்வாகம் வெளியிட்டுள்ள தகவலின்படி, இந்தத் தாக்குதலில் குறைந்தது 11 பேர் காயமடைந்துள்ளனர். குண்டுவெடிப்பின் அதிர்வால் வைத்தியசாலையின் ஜன்னல் கண்ணாடிகள் உடைந்தும், உட்புறக் கூரைகள் சரிந்தும் காணப்படுகின்றன. வைத்தியசாலைக்கு அருகிலிருந்த இரண்டு கட்டடங்கள் தரைமட்டமாக்கப்பட்டுள்ளன.
அதேநேரம், டயர் துறைமுகப் பகுதியிலும் இஸ்ரேலிய ட்ரோன் தாக்குதல்கள் நடத்தப்பட்டன. இதில் சிறிய படகு ஒன்று அழிக்கப்பட்டதுடன், அருகிலிருந்த ஏனைய படகுகளும் சேதமடைந்தன. இத்துறைமுகத் தாக்குதலில் ஒருவர் உயிரிழந்துள்ளதாக உறுதிப்படுத்தப்பட்ட தகவல்கள் தெரிவிக்கின்றன.
டயர் நகரிலிருந்து கடந்த சில வாரங்களில் பல்லாயிரக்கணக்கான மக்கள் வெளியேறியுள்ளனர். இருப்பினும், தற்போது சுமார் 20,000 மக்கள் அங்கு தங்கியிருப்பதாக அதிகாரிகள் மதிப்பிடுகின்றனர். இதில் அருகிலுள்ள கிராமங்களிலிருந்து இடம்பெயர்ந்து வந்த 15,000 அகதிகளும் அடங்குவர். இஸ்ரேலிய இராணுவம் நகரத்தின் பெரும் பகுதிகளுக்கு வெளியேற்ற உத்தரவுகளை (Evacuation Orders) பிறப்பித்துள்ளதால், எஞ்சியுள்ள மருத்துவக் கட்டமைப்பு மற்றும் பொதுமக்களுக்கான மனிதாபிமான உதவிகளில் கடும் நெருக்கடி ஏற்பட்டுள்ளது.
மறுபுறம், தெற்கு லெபனானில் இஸ்ரேல் தனது தரைவழிப் போரை விரிவுபடுத்தியுள்ளது. எல்லையோரப் பகுதிகளில் “பாதுகாப்பு வலயத்தை” (Security Zone) உருவாக்கும் நோக்கில் இஸ்ரேலியப் படைகள் பல கிலோமீட்டர் தூரம் முன்னேறியுள்ளன. குறிப்பாக ஐதரூன் (Aitaroun) மற்றும் மரூன் அல்-ராஸ் (Maroun al-Ras) போன்ற நகரங்களை இலக்கு வைத்து இஸ்ரேலிய துருப்புக்கள் உள்நுழைந்துள்ளன. இதற்குப் பதிலடியாக ஹிஸ்புல்லா அமைப்பினர் இஸ்ரேலின் வடக்கு மற்றும் மத்திய பகுதிகளை நோக்கி ஏவுகணைத் தாக்குதல்களைத் தொடர்ந்து முன்னெடுத்து வருகின்றனர்.
இந்த மோதலானது ஈரான் ஆதரவு படைகளுக்கும் அமெரிக்க-இஸ்ரேல் கூட்டணிக்கும் இடையிலான ஒரு பரந்த பிராந்தியப் போராக உருவெடுத்து வருவது குறிப்பிடத்தக்கது.
Spread the love
