விண்வெளிக் குப்பைகள் குறித்து அமெரிக்கா கவலை தெரிவித்துள்ளது. விண்வெளியில் செயற்கை கோளை சுட்டு வீழ்த்தும், மிஷன் சக்தி சோதனையை இந்தியா வெற்றிகரமாக செயல்படுத்தி உள்ளது. விண்வெளியில் 300 கிலோ மீற்றர் உயரத்தில் சுற்றி வந்த செயற்கைகோளை சுட்டு வீழ்த்திய இந்த சாதனையின் மூலம் அமெரிக்கா, ரஸ்யா, சீனா ஆகிய நாடுகளின் பட்டியலில் இந்தியாவும் இணைந்து உள்ளது.
இந்த நிலையில் செயற்கைகோள் எதிர்ப்பு ஏவுகணை சோதனை தொடர்பாக இந்தியாவின் அறிக்கையை தாங்கள் பார்த்ததாக தெரிவித்துள்ள அமெரிக்க வெளியுறவுத்துறை செய்தித் தொடர்பாளர் விண்வெளி பாதுகாப்பு, ஆராய்ச்சியில் இந்தியாவுடனான தொழில்நுட்ப ஒத்துழைப்பு தொடரும் எனத் தெரிவித்துள்ளார். அதேவேளை செயற்கைகோள்களால் விண்வெளியில் ஏற்படும் குப்பைகள் கவலை அளிப்பதாக உள்ளது எனவும் விண்வெளி குப்பைகளுக்கு தீர்வு காணும் வகையில் இந்த சோதனை வடிவமைக்கப்பட்டதாக கூறிய இந்தியாவின் அறிக்கைகளை கவனத்தில் கொண்டுள்ளதாகவும் தெரிவித்துள்ளார்.
தாழ்வான வளிமண்டலத்தில் இந்த சோதனை நடத்தப்பட்டிருப்பதால், விண்வெளியில் குப்பைகள் சேராது எனவும் உடைந்து சிதறிய செயற்கைக் கோள் குப்பைகள் சில வாரங்களில் பூமியில் வந்து விழும் எனவும் இந்திய வெளியுறவு அமைச்சு செய்தி வெளியிட்டிருந்தது குறிப்பிடத்தக்கது.
