பிரித்தானியாவின் பிரபல சுப்பர் மார்க்கெட் நிறுவனமான Asda, காலாவதியான உணவுகளை விற்பனை செய்ததற்காக £500,000 (சுமார் 20 கோடி இலங்கை ரூபாய்) அபராதம் விதிக்கப்பட்டதை அடுத்து, தனது அனைத்து கிளைகளிலும் ஒரு பாரிய மாற்றத்தைக் கொண்டு வந்துள்ளது.
பார்ன்ஸ்லி (Barnsley) பகுதியில் உள்ள ஒரு Asda கிளையில் நடத்தப்பட்ட சோதனையில், மனித ஆரோக்கியத்திற்கு ஆபத்தை விளைவிக்கக்கூடிய வகையில் காலாவதியான உணவுகள் விற்பனைக்கு வைக்கப்பட்டிருந்தது கண்டுபிடிக்கப்பட்டது.
காலாவதியான ஹம்முஸ் (hummus), பீட்சா மற்றும் கறி வகைகள் அவற்றின் “பயன்படுத்த வேண்டிய இறுதித் திகதிக்கு” (Use-by date) பின்னரும் 16 நாட்கள் வரை விற்பனைக்கு வைக்கப்பட்டிருந்தன.
இதனையடுத்து நீதிமன்றம் Asda நிறுவனத்திற்கு £507,767 அபராதமும் செலவுத் தொகையும் விதித்தது.
“Best Before” போலன்றி, “Use-by” திகதி என்பது உணவின் பாதுகாப்பைக் குறிப்பது. அதனைத் தாண்டி விற்பனை செய்வது சட்டப்படி குற்றமாகும்.
இந்த அபராதத்தைத் தொடர்ந்து, பிரித்தானியா முழுவதும் உள்ள தனது அனைத்து சுப்பர் மார்க்கெட்டுகளிலும் “திகதி சரிபார்ப்பு” முறையில் (Date checking process) Asda மாற்றங்களைச் செய்துள்ளது.அனைத்துக் கிளைகளிலும் தரப்படுத்தப்பட்ட புதிய திகதி குறியீடு சரிபார்ப்பு முறை (New Date Code Checking) அறிமுகப்படுத்தப்பட்டுள்ளது.குளிர்சாதனப் பெட்டிகளில் வைக்கப்படும் உணவுகள் (Chilled products) மற்றும் புதிய உணவுகள் தினமும் கட்டாயமாக மனிதர்களால் (Manual Check) சரிபார்க்கப்பட வேண்டும்.
காலாவதியான உணவுகள் எக்காரணம் கொண்டும் அலமாரிகளில் இருக்கக்கூடாது என்பதை உறுதிப்படுத்த அனைத்து ஊழியர்களுக்கும் விசேட பயிற்சிகள் வழங்கப்பட்டுள்ளன. நீண்ட காலம் பழுதடையாத உணவுகள் (Long-life products) வாரத்திற்கு இருமுறை கட்டாயம் சரிபார்க்கப்படும். நுகர்வோா் உணவுப் பொருட்களில் உள்ள இரண்டு வகையான திகதிகளைக் கவனிக்குமாறு கோரப்பட்டுள்ளனா்.
Use-By என்பது பாதுகாப்பு எச்சரிக்கை. இந்தத் திகதி முடிந்தால் அந்த உணவை உட்கொள்வது ஆபத்தானது. இதனை விற்பனை செய்வது சட்டவிரோதம் ஆகும்.
Best Before என்பது தரத்தைக் குறிப்பது. சுவை அல்லது மணம் மாறலாம், ஆனால் உண்பது பாதுகாப்பானது. இதனைத் தள்ளுபடி விலையில் விற்பனை செய்யலாம்.
Tag Words: #AsdaFine #FoodSafety #UKSupermarkets #BarnsleyCouncil #ConsumerProtection #RetailNews2026 #UseByDate #LKA
