MY3 + RW அரசிற்கு வெளியில் MR + GR அரசு???

 மகிந்த நியமித்த கோத்தபாய பயங்கரவாத தடைக் குழு!

முன்னாள் பாதுகாப்பு செயலாளர் கோத்தபாய ராஜபக்ச தலையில் குழுவொன்றை எதிர்கட்சித் தலைவர் மகிந்த ராஜபக்ச நியமித்துள்ளார். அரசாங்கம் ஒன்று பாதுகாப்பு கட்டமைப்புக்களை கொண்டுள்ள நிலையில், முன்னாள் ஜனாதிபதி ஒருவர் இவ்வாறு குழுவொன்றை அமைப்பது அரசியல் சட்டத்திற்கு முரணான விடயம் என்றும் கூறப்படுகின்றது.

மகிந்த ராஜபக்ச ஜனாதிபதியாகவும் கோத்தபாய ராஜபக்ச பாதுகாப்பு செயலாளராகவும் இருந்த காலத்தில் படைத்துறை கட்டமைப்புக்களில் இருந்தவர்களை கொண்டு இவ்வாறு குழுவை அமைப்பது இன்னொரு அரசிற்கு சமமான விடயம் என்றும் அரசியல் விமர்சகர்கள் கூறுகின்றனர்.

இதேவேளை, இந்த குழுவில் 2008/2009 காலப் பகுதியில் கொழும்பில் வைத்து 11இளைஞர்களை கடத்திச் சென்று தடுத்து வைத்து அவர்களை கொலை செய்ததாக குற்றம் சாட்டப்பட்ட முன்னாள் கடற்ப தளபதி வசந்த கரன்னாகொடவும் அடங்குகின்றார்.

நாட்டின் தபோதைய பாதுகாப்பு நடவடிக்கை குறித்து எதிர்க்கட்சித் தலைவர் மஹிந்த ராஜபக்ச, உயர் இராணுவ முன்னாள் தளபதிகள், மூத்த பாதுகாப்பு மற்றும் காவற்துறை  உத்தியோகத்தர்களை நேற்று சந்தித்து கலந்துரையாடினார்.

இதன்போது நாட்டின் நிலவரம் குறித்து அறிக்கையொன்றினை உடனடியாக அறியத்தர எதிர்க்கட்சி தலைவர் மஹிந்த ராஜபக்ச பணித்துள்ளார்.

அந்தவகையில் இதற்காக முன்னாள் பாதுகாப்பு தளபதிகள் மற்றும் புலனாய்வு அதிகாரிகள் ஆகியோரின் அனுபவங்களை பயன்படுத்தி தற்போதுள்ள நிலைமைகளை ஆராய தீர்மானம் எடுக்கப்பட்டு, முன்னாள் பாதுகாப்பு செயலாளர் கோட்டபாய ராஜபக்ஸ தலைமையில் குழுவொன்று நியமிக்கப்பட்டுள்ளது.

இதில் பாதுகாப்பு பிரதானி ஜகத் ஜெயசூரிய, முன்னாள் இராணுவ தளபதி தயா ரத்நாயக, முன்னாள் விமானப்படை தளபதி ரோஹான் குணதிலக, முன்னாள் கடற்படை தளபதி வசந்த கரன்னகொட, அட்மிரல் மொஹான் விஜேவிக்கிரம, அட்மிரல் ஜகத் கொலம்பகே, முன்னாள் பொலிஸ்மா அதிபர் மஹிந்த பாலசூரிய, சந்திர பெர்னாண்டோ, முன்னாள் சிரேஷ்ட பிரதி பொலிஸ்மா அதிபர் வகிஷ்த்த,வடக்கின் முன்னாள் ஆளுநர் மேஜர் ஜெனரல் சந்திரசிறி ஆகியோர் உள்ளடங்கிய குழு அமைக்கப்பட்டுள்ளது. #mahindarajapaksa #gotabayarajapaksa #. #eastersundaylk #srilanka