முல்லைத்தீவு, முல்லிவாய்க்கால் கிழக்குப் பிரதேசத்தில் பாதுகாப்பு தரப்பினரால் நேற்று அகழ்வுப் பணிகள் முன்னெடுக்கப்பட்டதாக தெரிவிக்கப்பட்டுள்ளது. இறுதி யுத்த காலத்தில் விடுதலைப் புலிகளால் தங்கம் மற்றும் ஆயுதங்கள் புதைக்கப்பட்டிருப்பது தொடர்பாக கிடைக்கப் பெற்ற தகவலின் படி இந்த அகழ்வுப்பணிகள் மேற்கொள்ளப்பட்டுள்ளன.
முல்லைத்தீவு பாதுகாப்பு பிரிவினருக்கு கிடைத்த தகவலின் அடிப்படையில் காவற்துறையினரால் முல்லைத்தீவு நீதவான் நீதிமன்றில் பெற்றுக் கொண்ட உத்தரவின் படி நீதவான் எஸ். லெனின்குமார் முன்னிலையில் இந்த அகழ்வுப் பணி முன்னெடுக்கப்பட்டுள்ளது.
சுமார் மூன்று மணித்தியாலங்கள் அகழ்வுப் பணிகள் இடம்பெற்ற போதிலும் பாதுகாப்பு தரப்பினரால் எந்தப் பொருட்களும் கண்டெடுக்கப்படவில்லை. இதற்கு முன்னரும் பல சந்தர்ப்பங்களில் முல்லைத்தீவு, புதுக்குடியிருப்பு மற்றும் முல்லிவாய்க்கால் பிரதேசங்களில் தங்கம் மற்றும் ஆயுதங்கள் புதைக்கப்பட்டிருப்பதாக கூறி அகழ்வுப் பணிகள் மேற்கொள்ளப்பட்டுள்ளதுடன், எதுவும் கண்டெடுக்கப்படவில்லை என்று தெரிவிக்கப்பட்டுள்ளது.
