பிரதமருக்கு எதிராக கொண்டுவரப்பட்டுள்ள நம்பிக்கையில்லாப் பிரேரணை குறித்து ஆராய ஸ்ரீலங்கா சுதந்திரக் கட்சியின் மத்திய குழுக் கூட்டம் இந்த வாரம் இடம்பெறும் எனவும் ஜனாதிபதியுடன் ஆழமாக கலந்துரையாடி பிரதமர் விவகாரத்தில் தீர்மானம் எடுக்கப்படவுள்ளதாகவும் அமைச்சர் சந்திம வீரக்கொடி தெரிவித்துள்ளார்.
பிரதமர் ரணில் விக்கிரமசிங்கவிற்கு எதிராக கூட்டு எதிர்க்கட்சி உறுப்பினர்கள் நம்பிக்கையில்லா பிரேரணை ஒன்றை கொண்டுவந்துள்ள நிலையில் எதிர்வரும் மாதம் 4 ஆம் திகதி குறித்த பிரேரணை வாக்கெடுப்பிற்கு விடப்படவுள்ளது. இந்நிலையில் ஸ்ரீலங்கா சுதந்திர கட்சியின் நிலைப்பாடு என்னவென வினவிய போதே அமைச்சர் இதனைக் குறிப்பிட்டார்.
மேலும் கருத்து வெளியிட்ட அவர், பிரதமருக்கு எதிராக தொடர்ச்சியாக நெருக்கடி நிலைமைகள் ஏற்படுத்தப்பட்டு வருகின்றன. அதற்கு ஐக்கிய தேசியக் கட்சியே பிரதான காரணமாகும். அவர்களின் கொள்கைகள், செயற்பாடுகள் என்பவற்றில் பாரிய நெருக்கடி நிலைமைகள் உள்ளன. ஐக்கிய தேசியக் கட்சியின் சில உறுப்பினர்களே மீண்டும் தமது நிலைப்பாட்டினை மாற்றியமைத்து பிரதமருக்கு எதிராக செயற்பட உள்ளதாகவும், ஊடகங்களில் அறிய முடிகின்றது. எனினும் ஸ்ரீலங்கா சுதந்திர கட்சியாக நாம் இன்னமும் எந்தவித இறுதித் தீர்மானதையும் எடுக்கவில்லை. பிரேரணையில் கைச்சாத்திடுவது குறித்து தனித்து தீர்மானம் எடுக்க முடியாது.
ஸ்ரீலங்கா சுதந்திர கட்சியின் மத்திய குழுக் கூட்டத்திலேயே பிரேரனை குறித்து தீர்மானிக்கப்படும். ஜனாதிபதி பாகிஸ்தானிய விஜயத்தை முடித்துக்கொண்டு ஜனாதிபதி இலங்கை திரும்பியுள்ளார். எனவே அடுத்த கட்ட நடவடிக்கைகள் இந்த வாரத்தில் முன்னெடுக்கப்படும் எனத் தெரிவித்துள்ளார்.
