வரலாற்று சிறப்பு மிக்க மாவிட்டபுரம் கந்தசுவாமி கோவில் வருடாந்திர மகோற்சவ தேர்த்திருவிழா இன்றைய தினம் செவ்வாய்க்கிழமை நடைபெற்றது. காலை நடைபெற்ற வசந்தமண்டப பூஜையை தொடர்ந்து , ஆறுமுகசுவாமி வள்ளி , தெய்வானை சமேதரராய் விநாயகபெருமானுடன் உள்வீதியுலா வந்து காலை 11 மணியளவில் தேரில் ஆரோகணித்து பக்தர்களுக்கு அருட்காட்சி அளித்தார்.
தொன்மையும் அற்புதங்கள் நிறைந்த மாவிட்டபுரம் கந்தசுவாமி ஆலய அதி சிறப்பும் மிகப் பெரியதுமான பஞ்சரதங்களின் நடுநாயகமாக விளங்கும் சண்முகப் பெருமானின் முக உத்தர திருத்தேர் 1990ஆம் ஆண்டுகளில் நடைபெற்ற உள்நாட்டுப் போரில் ஏனைய நான்கு தேர்கள், சப்பரம், திருமஞ்சம், கைலாயவாகனம் என்பவற்றுடன் முற்றுமுழுதாக அழிவடைந்தது.
இப்பொழுது முன்பிருந்த முக உத்தர தேரைவிட இன்னும் பெரிதாகவும் 45 அடி உயரம் கொண்டு மேலும் சிறப்பான சிற்பங்களையும் கொண்டதாக தேர் இந்த ஆண்டு அமைத்து முடிக்கப்பட்டது. இந்தச் சிறப்பு வாய்ந்த மாபெரும் முக உத்தர தேரில் 29 வருடங்களின் பின்னர் ஆறுமுக பெருமான் தேரில் ஆரோகணித்தார் என்பது குறிப்பிடத்தக்கது. #மாவிட்டபுரம் #கந்தசுவாமி கோவில் #தேர்த்திருவிழா #தேர்
