.ரிக் ரொக் நேரலைகளுடன் அடாவடியில் ஈடுபட்டு வந்தவர் விளக்கமறியலில்

யாழ்ப்பாணத்தில் சமூக வலைத்தளத்தில் நேரலையில் காணொளிகளை வெளியிட்டவாறு , பலவேறு தரப்பினருடனும் முரண்பட்டு வந்த நபர்  காவல்துறையினரினால் கைது செய்யப்பட்டு , நீதிமன்ற உத்தரவில் 14 நாட்கள் விளக்கமறியலில் வைக்கப்பட்டுள்ளார்.  புலம்பெயர் நாடொன்றில் இருந்து யாழ்ப்பாணம்  சென்றுள்ள நபர் ஒருவர் ரிக் ரொக் தளத்தில் நேரலை வீடியோக்களை பதிவிட்ட வாறு பல்வேறு தரப்பினருடனும் முரண்பட்டு வந்துள்ளார்.

ஒரு சில மாதங்களுக்கு முன்னர் , வரணி பகுதியில் உள்ள தனியார் வங்கி ஒன்றுக்கு சென்று , வெளிநாட்டு பணத்தினை உள்ளூர் பெறுமதிக்கு மாற்ற வங்கியில் கால தாமதம் ஏற்பட்டதாக நேரலையில் வீடியோ பதிவிட்டவாறு , வங்கியின் முகாமையாளர் , உத்தியோகஸ்தர்கள் , பாதுகாப்பு உத்தியோகஸ்தர்கள் என அனைவருடனும் முரண்பட்டுக்கொண்டார்.

அதுபோன்று சில வாரங்களுக்கு முன்னர் கொடிகாமம் காவல்நிலையத்தினுள் சென்று , காவல்துறையினா்   முறைப்பாடுகளை பதிய கால தாமதம் செய்வதாக நேரலை வீடியோக்களை வெளியிட்டு , காவல்துறையினருடனும் முரண்பட்டுக்கொண்டார்.

இந்நிலையில் கடந்த வாரம் வரணி பகுதியில் உள்ள பாடசாலை ஒன்றின் இல்ல மெய்வல்லுனர் போட்டி ஒன்றுக்கு சென்று , மாணவிகள் , அவர்களின் அனுமதியின்றி , ரிக் ரொக் தளத்தில் நேரலையில் காணொளிகளை பதிவிட்ட போது , பாடசாலையில் கடமையில் நின்ற காவல்துறையினா்   அதிபரின் அனுமதியின்றி மாணவிகளை காணொளி எடுக்க முடியாது என அறிவுறுத்திய போது , காவல்துறை   உத்தியோகஸ்தர்களுடனும் முரண்பட்டு , அவற்றினையும் காணொளிகளாக வெளியிட்டார்.

குறித்த காணொளிகள் சமூக வலைத்தளங்களில் பரவியதை அடுத்து , காவல்துறை    உயர் அதிகாரிகளின் அறிவுறுத்தலின் பேரில்  குறித்த நபரை கைது செய்த கொடிகாம காவல்துறையினா்  விசாரணைகளின் பின்னர் அந்நபரை சாவகச்சேரி நீதவான் நீதிமன்றில் முற்படுத்திய வேளை அவரை விளக்கமறியலில் வைக்குமாறு மன்று உத்தரவிட்டுள்ளது.