யாழ்ப்பாணப் பல்கலைக்கழகச் சித்த மருத்துவப் பீடத்தின் மூத்த விரிவுரையாளர் கழுத்து நெரித்துக் கொலை செய்யப்பட்டுள்ளார் என்பது சட்ட மருத்துவ அதிகாரியின் (JMO) உடற்கூற்றுப் பரிசோதனை அறிக்கையின் மூலம் உறுதிப்படுத்தப்பட்டுள்ளதாக காவல்துறையினா் நீதிமன்றத்தில் தெரிவித்துள்ளனர்.
நாடு முழுவதும் பெரும் அதிர்ச்சியை ஏற்படுத்திய இந்த விரிவுரையாளரின் படுகொலை தொடர்பான வழக்கு விசாரணை, நேற்று (2026 மே 20, புதன்கிழமை) யாழ்ப்பாண நீதவான் நீதிமன்றத்தில் எடுத்துக்கொள்ளப்பட்ட போதே இந்த திடுக்கிடும் விபரங்கள் உத்தியோகபூர்வமாக வெளிப்படுத்தப்பட்டன.
யாழ்ப்பாணப் பல்கலைக்கழகச் சித்த மருத்துவப் பீடத்தின் மூத்த விரிவுரையாளரான தயாளனி திலீபன் கடந்த மார்ச் மாதம் 18-ஆம் திகதி படுகொலை செய்யப்பட்டார். அவரது சடலம் சாவகச்சேரி, தனங்கிளப்பு பகுதியில் உள்ள புதர் ஒன்றிலிருந்து (பற்றைக்காடு) மீட்கப்பட்டிருந்தது.இக்கொலைச் சம்பவம் தொடர்பாகத் தீவிர விசாரணைகளை மேற்கொண்ட காவற்துறையினர், உயிரிழந்த விரிவுரையாளரின் சொந்த மகள் மற்றும் அவரது மருமகன் ஆகிய இருவரையும் பிரதான சந்தேகநபர்களாகக் கைது செய்தனர்.
நீதிமன்ற உத்தரவின் பேரில் தொடர்ந்து விளக்கமறியலில் வைக்கப்பட்டுள்ள விரிவுரையாளரின் மகளும் மருமகனும் நேற்று சிறைச்சாலை அதிகாரிகளால் நீதவான் முன்னிலையில் முன்னிலைப்படுத்தப்பட்டனர். நேற்று நடைபெற்ற வழக்கு விசாரணையின் போது, கொல்லப்பட்ட விரிவுரையாளரின் மகனும் (சந்தேகநபரின் சகோதரர்) மற்றும் இவ்வழக்கை விசாரிக்கும் காவல்துறை அதிகாரிகளும் மன்றில் முன்னிலையாகித் தங்களது சாட்சியங்களைப் பதிவு செய்தனர்.
விரிவுரையாளர் தயாளனி திலீபன் இயற்கையாக மரணிக்கவில்லை என்றும், அவர் திட்டமிட்டுக் கழுத்து நெரித்துக் கொலை செய்யப்பட்டுள்ளார் என்றும் சட்ட மருத்துவ அதிகாரியின் இறுதி அறிக்கை கூறுவதை காவல்துறையினா் நீதிமன்றிடம் சமர்ப்பித்தனர்.
சமர்ப்பிக்கப்பட்ட சாட்சியங்கள் மற்றும் மருத்துவ அறிக்கைகளைப் பரிசீலித்த யாழ்ப்பாண நீதவான், சந்தேகநபர்களான மகளையும் மருமகனையும் எதிர்வரும் ஜூன் மாதம் 3-ஆம் திகதி வரை தொடர்ந்து விளக்கமறியலில் (Remand) வைக்குமாறு உத்தரவிட்டார். அத்துடன், வழக்கின் மேலதிக விசாரணைகளும் அன்றைய தினத்திற்கு ஒத்திவைக்கப்பட்டன.
ஒரு சமூகத்திற்கு அறிவூட்டும் பல்கலைக்கழக மூத்த விரிவுரையாளர் ஒருவர், அவரது சொந்த மகள் மற்றும் மருமகனாலேயே கழுத்து நெரித்துக் கொலை செய்யப்பட்டுள்ளதாக வெளிவந்துள்ள மருத்துவ அறிக்கை குடாநாட்டு மக்களிடையே பெரும் அதிர்ச்சியையும் சோகத்தையும் ஏற்படுத்தியுள்ளது. குடும்பத் தகராறு அல்லது சொத்துத் தகராறு காரணமாக இக்கொலை நடந்திருக்கலாம் என ஆரம்பத்தில் சந்தேகிக்கப்பட்ட நிலையில், தற்போது சாட்சியப் பதிவுகள் ஆரம்பமாகியுள்ளன. விரிவுரையாளரின் மகனே தனது தாயின் கொலைக்கு எதிராக நீதிமன்றில் சாட்சியமளித்துள்ளமை குறிப்பிடத்தக்கது. ஜூன் 3-ஆம் திகதி நடைபெறவுள்ள அடுத்த கட்ட விசாரணைகளின் போது இக்கொலையின் பின்னணியிலுள்ள முழுமையான உண்மைகள் வெளிவரும் என எதிர்பார்க்கப்படுகிறது.
#JaffnaUniversity #LecturerMurderCase #JaffnaCourt #ChavakachcheriNews #RemandExtended
