ஐக்கிய அரபு அமீரகத்தின் (UAE) ஷார்ஜாவிலிருந்து பாகிஸ்தானின் கராச்சி நோக்கிப் பயணித்த போயிங் ரகச் சரக்கு விமானம் (Cargo Flight) ஒன்று, நேற்று செவ்வாய்க்கிழமை நடுவானில் திடீரெனக் கட்டுப்பாட்டு அறையுடனான தொடர்பை இழந்து மாயமாகியுள்ளதாக சர்வதேச விமானப் போக்குவரத்துப் பிரிவினர் உத்தியோகபூர்வமாகத் தெரிவித்துள்ளனர். விமானப் போக்குவரத்துத் தரவுகளின்படி, தொடர்பை இழப்பதற்குச் சற்று முன்னர் குறிப்பிட்ட விமானம் மிகத் தீவிரமான வேகத்தில் கீழ்நோக்கி இறங்கியுள்ளது (Rapidly Descended) கண்டறியப்பட்டுள்ளது.
ஷார்ஜாவிலிருந்து புறப்பட்டு இரண்டு மணித்தியாலப் பயண இலக்கைக் கொண்ட இப் போயிங் 737 (Boeing 737) ரகச் சரக்கு விமானமானது, AP-BOI என்ற குறியீட்டு இலக்கத்தைக் கொண்டதாகும்.
விமானம் புறப்பட்டுச் சரியாக 80 நிமிடங்கள் கடந்த நிலையில், பாகிஸ்தானின் கராச்சி கடற்பரப்பிற்கு (Karachi Coast) அருகே பறந்துகொண்டிருந்த போது, ரேடார் (Radar) திரைகளில் இருந்து அது திடீரென மறைந்துள்ளது. இவ்விமானத்தில் ஐந்து பணியாளர்கள் (Crew Members) பயணித்ததாகப் பாகிஸ்தான் சிவில் விமானப் போக்குவரத்து அதிகார சபை உறுதிப்படுத்தியுள்ளது.
விமானம் மாயமான கடற்பரப்பை இலக்கு வைத்துப் பாகிஸ்தான் கடற்படை மற்றும் கடலோரக் காவல்படையினர் விசேட ஹெலிகாப்டர்கள் மற்றும் தேடுதல் கப்பல்கள் மூலமாக அவசர மீட்பு நடவடிக்கைகளை முடுக்கிவிட்டுள்ளனர். தொழில்நுட்பக் கோளாறு காரணமாக விமானம் கடலுக்குள் வீழ்ந்து விபத்துக்குள்ளாகியிருக்கலாம் என முதற்கட்டமாக அஞ்சப்படுகிறது. எனினும், உத்தியோகபூர்வத் தகவல்கள் எதுவும் இதுவரை வெளியாகவில்லை.
#BoeingCargoMissing2026 #UAEPakistanFlightCrash #APBOICargoFlight #KarachiCoastSearch #AviationAccidentNews
