இலங்கை உட்பட 60 நாடுகளின் பொருட்கள் மீது புதிய வரி விதித்த ட்ரம்ப்
தற்காலிகமாக விதிக்கப்பட்டிருந்த 10% உலகளாவிய வரிகள் நள்ளிரவுடன் காலாவதியாகியுள்ள நிலையில், இலங்கை உட்பட 60 வர்த்தகக் கூட்டாளி நாடுகளின் பொருட்கள் மீது 10% மற்றும் 12.5% என்ற புதிய வரிகளை விதிப்பதாக அமெரிக்க ஜனாதிபதி டொனால்ட் ட்ரம்பின் (Donald Trump) நிர்வாகம் அதிகாரப்பூர்வமாகப் பிரகடனம் செய்துள்ளது. இப் புதிய வரிகள் இன்றைய தினம் (2026 ஜூலை 24) வெள்ளிக்கிழமை அதிகாலை 12:01 மணி முதல் உத்தியோகபூர்வமாக அமுலுக்கு வந்துள்ளன.
சர்வதேச அளவில் “கட்டாய உழைப்புத் தடைச் சட்டங்களை” (Forced Labor Import Bans) பல வர்த்தகப் பங்காளி நாடுகள் முறையாக அமல்படுத்தத் தவறியுள்ளதாகக் குற்றம் சாட்டியே, அமெரிக்க வர்த்தகப் பிரதிநிதி (USTR) ஜேமிசன் கிரீரின் அலுவலகம் நடத்திய விசேட “பிரிவு 301” (Section 301) விசாரணைகளின் முடிவில் இப் பாரிய தீர்மானம் எடுக்கப்பட்டுள்ளது.
அமெரிக்க வெள்ளை மாளிகை மற்றும் வர்த்தகப் பிரதிநிதியின் இறுதி உத்தியோகபூர்வ அறிவிப்பின்படி, வரிகளின் இறுதி விகிதக் கட்டமைப்பு பின்வருமாறு மாற்றியமைக்கப்பட்டுள்ளது:
கட்டாய உழைப்பிற்கு எதிராக ஓரளவிற்கேனும் தடைகளை அமுல்படுத்தியுள்ள பிரித்தானியா, கனடா, மெக்சிகோ, இந்தியா, பங்களாதேஷ், பாகிஸ்தான், ஆர்ஜென்டினா, கம்போடியா, ஈக்வடோர், குவாத்தமாலா, ஒண்டுராஸ், இந்தோனேசியா, ஜோர்தான், மலேசியா, டிரினிடாட் மற்றும் டொபாகோ, எல் சல்வடோர் மற்றும் தாய்வான் ஆகிய 17 நாடுகளின் பொருட்களுக்கு 10% வரி விதிக்கப்பட்டுள்ளது.
ஆரம்ப கட்ட உத்தேசப் பட்டியலில் சில குழப்பங்கள் இருந்தபோதிலும், இறுதி உத்தியோகபூர்வ அறிவிப்பின்படி இலங்கையிலிருந்து இறக்குமதி செய்யப்படும் பொருட்களுக்கு 12.5% வரி விதிக்கப்பட்டுள்ளது. சீனா, வியட்நாம் உள்ளிட்ட ஏனைய 43 நாடுகளுக்கும் இதே 12.5% வரியே விதிக்கப்பட்டுள்ளது.
ஐரோப்பிய ஒன்றியம் (EU) உள்ளிட்ட 5 பிரதான கூட்டாளிகளுக்கு, அவர்களது ஒட்டுமொத்த வரி விகிதத்தை 10% அல்லது 12.5% என்ற எல்லைக்குக் கொண்டு வரும் வகையில் கூடுதல் வரிகள் அறிமுகப்படுத்தப்பட்டுள்ளன.
அமெரிக்க வர்த்தகப் பற்றாக்குறையைக் குறைக்கும் நோக்கில் கடந்த ஆண்டு தேசிய அவசரகாலச் சட்டத்தின்கீழ் (IEEPA) ட்ரம்ப் விதித்திருந்த 10% முதல் 50% வரையிலான “பரஸ்பர” வரிகளை (Reciprocal Tariffs), அமெரிக்க உயர் நீதிமன்றம் (US Supreme Court) கடந்த பெப்ரவரி மாதம் ரத்து செய்தது.
அதனைத் தொடர்ந்து, ‘வர்த்தகச் சட்டம் 1974-இன் பிரிவு 122’-இன் (Section 122) கீழ் 150 நாட்களுக்கு 10% தற்காலிக வரியை ட்ரம்ப் விதித்திருந்தார். அந்த 150 நாட்கள் அவகாசம் இன்றுடன் (ஜூலை 24) நிறைவடையும் சூழலிலேயே, சட்டரீதியாக வலிமையான ‘பிரிவு 301 கட்டாய உழைப்பு’ விதியைப் பயன்படுத்தி, ஜனாதிபதி டொனால்ட் ட்ரம்பின் உலகளாவிய வரி என்ற தேர்தல் வாக்குறுதியை வெள்ளை மாளிகை புதிய முயற்சியாக அமுல்படுத்தியுள்ளது. இருப்பினும், கார் பாகங்கள், எஃகு (Steel) மற்றும் அலுமினியம் போன்ற ஏற்கனவே விசேட வரிகளுக்குள் உள்ள பொருட்களுக்கு இதிலிருந்து விதிவிலக்கு அளிக்கப்பட்டுள்ளது.
#TrumpGlobalTariffs2026 #SriLankaUSForcedLaborTariff #Section301TradeInvestigation #USWhiteHouseTariffWall #GlobalEconomicTradeNews
