🧭 “தனியார் காணிகளை அபகரித்தது மகா தவறு” – நயினாதீவு விகாராதிபதி

தனியார் காணிகளை அபகரித்தது , மகா தவறு, நயினாதீவு விகாராதிபதி ,தையிட்டி திஸ்ஸ விகாரை

யாழ்ப்பாணம், தையிட்டி திஸ்ஸ விகாரை விவகாரத்தில் நயினாதீவு நாக விகாரை விகாராதிபதி ஸ்ரீ நவடகல பதும கீர்த்தி திஸ்ஸ அவர்கள் வெளியிட்டுள்ள கருத்துக்கள், பாதிக்கப்பட்ட தமிழ் மக்களுக்கு பெரும் நம்பிக்கையை ஏற்படுத்தியுள்ளது.

இன்று வெள்ளிக்கிழமை தையிட்டிக்கு நேரில் விஜயம் செய்த விகாராதிபதி, அங்குள்ள நிலைமைகளை ஆராய்ந்த பின்னர் ஊடகங்களிடம் மிகவும் துணிச்சலான கருத்துக்களைப் பகிர்ந்து கொண்டார்.

“பிறர் பொருட்களை எடுக்கக் கூடாது என புத்தர் போதித்திருக்கிறார். மற்றவர்களுக்கு போதனை செய்யும் பௌத்த துறவிகள், இராணுவத்துடன் இணைந்து மக்களின் காணிகளை அபகரித்து விகாரை கட்டியது மகா தவறு” என அவர் பகிரங்கமாகச் சாடியுள்ளார்.

திஸ்ஸ விகாரைக்கு என ஏற்கனவே சொந்தக் காணிகள் இருக்கும் போது, ஏன் தமிழ் மக்களின் தனியார் காணிகளை அபகரிக்க வேண்டும் என்ற கேள்வியை அவர் எழுப்பியுள்ளார். “காணிகளை நான்கு கட்டமாக விடுவிப்போம் என்பது மக்களை ஏமாற்றும் செயல். அப்படிச் செய்தால் ஒவ்வொரு கட்டத்திற்கும் பல ஆண்டுகள் கடந்துவிடும். எனவே, அனைத்துக் காணிகளையும் ஒரே தடவையில் விடுவிக்க வேண்டும்” என அவர் வலியுறுத்தியுள்ளார்.

தையிட்டி மக்களின் போராட்டம் அறமானது என்பதாலேயே தான் குரல் கொடுத்ததாகவும், அதன் பின்னரே யாழ்ப்பாண நாக விகாரை விகாராதிபதியும், தையிட்டி விகாரதிபதியும் உடன்பட்டுப் பேசத் தொடங்கியுள்ளதாகவும் அவர் குறிப்பிட்டுள்ளார்.

காணிகளை இழந்த மக்கள் வீதியில் நின்று போராடுவது அவர்களது உரிமை. எனவே, போராட்டக்காரர்களுக்கு எதிராக வழக்குத் தாக்கல் செய்வதை விடுத்து, அவர்களுக்கு காவல்துறையினா் ரபாதுகாப்பு வழங்க வேண்டும் என காவல்துறை மா அதிபரிடம் அவர் கோரிக்கை விடுத்துள்ளார்.

ஒரு மூத்த பௌத்த மதகுருவே இராணுவத்தின் தலையீட்டையும், சட்டவிரோத விகாரை அமைப்பையும் கண்டித்திருப்பது, தையிட்டி காணி விடுவிப்பு போராட்டத்தில் ஒரு திருப்புமுனையாகக் கருதப்படுகிறது. இது மத நல்லிணக்கத்தை நோக்கிய ஒரு நேர்மறையான நகர்வாகவும் பார்க்கப்படுகிறது.

Tag Words: #NainativuAbbot #ThaiyittiTissaVihara #JaffnaNews #LandRights #Reconciliation #BuddhistMonk #JusticeForJaffna #CattleTheft #TamilNews #SriLankaPolitics