மகிந்தவை நீக்க வேண்டுமாயின் நம்பிக்கையில்லாப் பிரேரணை கொண்டுவரப்பட வேண்டும்..

தேர்தல் ஒன்றின் மூலம் ஜனநாயகரீதியாக மக்களால் தெரிவு செய்யப்பட்ட பிரதமரான திரு. ரணில் விக்கிரமசிங்கவை, எந்தவிதக் காரணமுமின்றித் திரு. மைத்திரிபால சிறிசேன பதவியில் இருந்து தூக்கினார், என்பதோடல்லாமல், வேலிக்குள் இருந்த ஓணானைத் தூக்கி மடிக்குள் வைத்த கதையாகத் திரு. மகிந்த ராஜபக்ஷவை பிரதமராக்கி அழகு பார்த்தார்.

திரு. ரணில் விக்கிரமசிங்கவைப் பதவியில் இருந்து தூக்கியபோது அவசியப்படாத நம்பிக்கையில்லாத் தீர்மானம், இப்பொழுது திரு. மகிந்த ராஜபக்ஷவைத் தூக்கும்போது மட்டும் அவசியப்படுகின்றதாம்? எப்படியெல்லாம் நியாயம் அளக்கின்றார்கள்? என்ன இருந்தாலும் தன் குஞ்சு பொன் குஞ்சுதானே!

முன்வைத்த காலைப் பின்வைக்காத திரு. மைத்திரிபால சிறிசேன, நாளை என்ன முடிவை எடுப்பாரோ, தெரியவில்லை? ஆனாலும் பதவி துறப்பதாக அவர் சூளுரைத்ததை மக்கள் மறக்கவில்லை. இப்படித்தான் முன்பும், ‘மீண்டும் ஜனாதிபதித் தேர்தலொன்றில் நான் போட்டியிடமாட்டேன்’, என்று கூறியவர், இப்பொழுது அதிலேயே குறியாக இருக்கின்றார். இன்றும் அப்படித்தான் எதையாவது சொல்லி ஜனாதிபதிக் கதிரையை கட்டிப் பிடித்துக்கொண்டிருப்பார், என்பதில் யாருக்கும் சந்தேகம் இருக்காதே? அவர் எதைத்தான் கடைப்பிடித்தார், இதைக் கடைப்பிடிக்க?