முல்லைத்தீவில் மாவட்டத்தில் தொடரும் கனமழை மற்றும் அனர்த்தம் காரணமாக ஒருவர் உயிரிழந்துள்ளதுடன் 34 குடும்பங்களை சேர்ந்த 101 பேர் பாதிக்கப்பட்டுள்ளனர் என முல்லைத்தீவு மாவட்ட அனர்த்த முகாமைத்துவ பிரிவு தெரிவித்துள்ளது
முல்லைத்தீவு மாவட்டத்தின் பல்வேறு பகுதிகளிலும் தொடர்ச்சியாக பெய்து வருகின்ற கனமழை காரணமாக தாழ்நிலப்பகுதிகள் பல வெள்ளத்தில் மூழ்கியுள்ளன. வீடுகள் சிலவற்றிற்குள் வெள்ளம் புகுந்துள்ளதுடன் வயல் நிலங்கள் வெள்ளத்தால் சூழப்பட்டுள்ளன. இதன் காரணமாக பல்வேறு குடும்பங்கள் பாதிக்கப்பட்டுள்ளன.
கடும் காற்று வீசுவதோடு பல்வேறு அனர்த்தங்களுக்கு மக்கள் முகம் கொடுத்து வருகின்றனர். அந்த வகையில் முல்லைத்தீவு மாவட்டத்தில் நேற்று (25) மாலை வரையான காலப்பகுதியில் ஒருவர் உயிரிழந்துள்ளதுடன் 34 குடும்பங்களை சேர்ந்த 101 பேர் பாதிக்கப்பட்டுள்ளனர் எனத் தொிவிக்கப்பட்டுள்ளது
