கேப் வெர்டே தீவுகளின் தலைநகரான பிரையா (Praia) துறைமுகத்திற்கு அப்பால் நங்கூரமிடப்பட்டுள்ள MV Hondius சொகுசுக் கப்பலில் ஏற்பட்டுள்ள ஹண்டாவைரஸ் (Hantavirus) பரவல் சர்வதேச ரீதியாகப் பெரும் கவலையை ஏற்படுத்தியுள்ளது. கோவிட்-19 பெருந்தொற்றுக்கு பிந்தைய காலத்தில், விலங்குகளிடமிருந்து பரவும் வைரஸ்கள் குறித்த அச்சம் மக்களிடையே அதிகரித்துள்ள நிலையில், இச்சம்பவம் மிகுந்த முக்கியத்துவம் பெறுகிறது. வழமையாக எலிகள் மூலம் பரவும் இந்த வைரஸ், தற்போது மனிதர்களுக்கு இடையே பரவியிருக்கலாம் என்ற சந்தேகம் எழுந்துள்ளமை மருத்துவ உலகை அதிரவைத்துள்ளது.
MV Hondius கப்பலில் இருந்த பயணிகளில் இதுவரை 3 பேர் உயிரிழந்துள்ளனர். 2 பேருக்கு வைரஸ் தொற்று உறுதி செய்யப்பட்டுள்ளதுடன், மேலும் 5 பேருக்குத் தொற்று இருக்கலாம் எனச் சந்தேகிக்கப்படுகிறது. கப்பலில் சிக்கியுள்ள 148 பயணிகளில் 20-க்கும் மேற்பட்டோர் பிரித்தானியர்கள் ஆவர். ஒரு பிரித்தானிய வைத்தியர் அவசர சிகிச்சைக்காக விமானம் மூலம் மீட்கப்படவுள்ளார் .கடந்த ஞாயிற்றுக்கிழமை முதல் இக்கப்பல் கேப் வெர்டே கரையில் நிறுத்தப்பட்டுள்ளது. பாதுகாப்பு கருதி பயணிகள் தரையிறங்க அனுமதிக்கப்படவில்லை.
ஹண்டாவைரஸ் என்பது பொதுவாக எலிகள் மற்றும் சுண்டெலிகளின் கழிவுகள் (சிறுநீர், மலம்) அல்லது உமிழ்நீர் மூலம் மனிதர்களுக்குப் பரவும் ஒரு வைரஸ் ஆகும். பாதிக்கப்பட்ட எலியின் கழிவுகள் காய்ந்து தூசியாக மாறும் போது, அதை மனிதர்கள் சுவாசிப்பதன் மூலம் தொற்று ஏற்படுகிறது.
MV Hondius கப்பலில் எலிகள் இல்லை எனத் தெரிவிக்கப்பட்டுள்ளது. இது உண்மையானால், வழக்கத்திற்கு மாறாக மனிதர்களுக்கு இடையே (Human-to-human transmission) இந்த வைரஸ் பரவியிருக்கக்கூடும் என்ற அரிய மற்றும் ஆபத்தான சாத்தியக்கூறினை இது காட்டுகிறது.
ஹண்டாவைரஸ் பாதிப்பு ஏற்பட்டால் அது சுவாசக் கோளாறுகளை (Hantavirus Pulmonary Syndrome) ஏற்படுத்தி உயிராபத்தை விளைவிக்கக்கூடியது. பொதுவாக இது மனிதர்களிடையே பரவுவதில்லை என்ற மருத்துவ நம்பிக்கையை இச்சம்பவம் கேள்விக்குள்ளாக்கியுள்ளது. கேப் வெர்டே அதிகாரிகள் கப்பலைத் தனிமைப்படுத்தியுள்ள நிலையில், உலக சுகாதார நிறுவனம் (WHO) நிலைமையைக் கண்காணித்து வருகிறது. கப்பலுக்குள் எலிகள் இல்லையென்றால், வைரஸ் எவ்வாறு பரவியது என்பதைக் கண்டறியும் விரிவான மரபணு சோதனைகள் அவசியமாகின்றன. கோவிட் காலத்துத் தனிமைப்படுத்தல் அனுபவங்கள் இப்போதும் பயணிகளிடையே ஒருவித உளவியல் ரீதியான அச்சத்தை ஏற்படுத்தியுள்ளன.
#HantavirusOutbreak #MVHondius #CruiseShipQuarantine #ZoonoticDisease #CapeVerde
