160
ஐஎஸ்ஐஎஸ் (ISIS) பயங்கரவாத அமைப்பின் உலகளாவிய ரீதியிலான இரண்டாம் நிலைத் தளபதியான அபு-பிலால் அல்-மினுகி (Abu-Bilal al-Minuki), கூட்டு இராணுவ நடவடிக்கை ஒன்றின் மூலம் சுட்டுக்கொல்லப்பட்டுள்ளதாக அமெரிக்க ஜனாதிபதி டொனால்ட் ட்ரம்ப் அறிவித்துள்ளார். அமெரிக்கப் படைகளும், நைஜீரிய ஆயுதப் படைகளும் இணைந்து ஆபிரிக்காவில் மேற்கொண்ட மிகவும் துல்லியமான மற்றும் சிக்கலான இரகசியத் தாக்குதல் ஒன்றின் போதே அவர் வான்வழியாகவோ அல்லது களமுனையிலோ ஒழிக்கப்பட்டதாகத் தெரிவிக்கப்பட்டுள்ளது. உலகிலேயே மிகத் தீவிரமாகச் செயற்பட்டு வந்த பயங்கரவாதி ஒருவரை களமுனையில் இருந்து வெற்றிகரமாக அகற்றியுள்ளதாக ஜனாதிபதி ட்ரம்ப் தனது சமூக வலைத்தளப் பதிவில் பெருமிதத்துடன் குறிப்பிட்டுள்ளார்.
கொல்லப்பட்ட அபு-பிலால் அல்-மினுகி, நைஜீரியப் பிரஜை என்பதுடன், ஆபிரிக்காவில் மறைந்திருந்து கொண்டு அமெரிக்கர்களை இலக்கு வைத்து பயங்கரவாதத் தாக்குதல்களை நடத்தத் திட்டமிட்டு வந்ததாக அமெரிக்க உளவுத்துறை தெரிவித்துள்ளது.
முன்னதாக, கடந்த 2023ஆம் ஆண்டில் அப்போதைய ஜோ பைடன் நிர்வாகத்தினால் இவர் ‘உலகளாவிய பயங்கரவாதி’ என அறிவிக்கப்பட்டு, தடைகள் விதிக்கப்பட்டிருந்தமை குறிப்பிடத்தக்கது. இந்த வெற்றிகரமான கூட்டுத் தாக்குதலுக்கு முழுமையான ஒத்துழைப்பை வழங்கிய நைஜீரிய அரசாங்கத்திற்கு அமெரிக்க ஜனாதிபதி தனது நன்றியினைத் தெரிவித்துள்ளார். இவரின் மறைவோடு ஐஎஸ்ஐஎஸ் அமைப்பின் உலகளாவிய பயங்கரவாதச் செயற்பாடுகள் பெருமளவில் பலவீனமடையும் என சர்வதேச அரசியல் ஆய்வாளர்கள் கருதுகின்றனர்.
Spread the love
