52
அம்பாறை மாவட்டம், தமண காவற்துறைப் பிரிவுக்குட்பட்ட கஞ்சிகுடியாறு – பக்மிட்டியா காட்டுப்பகுதியில், மரப்பொந்து ஒன்றினுள் மறைத்து வைக்கப்பட்டிருந்த ஸ்னைப்பர் (Sniper) ரக துப்பாக்கி உள்ளிட்ட ஆயுதங்களை விசேட அதிரடிப்படையினர் (STF) மீட்டுள்ளனர். நேற்று திங்கட்கிழமை (2026 ஜூன் 29) மாலை, திருக்கோவில் விசேட அதிரடிப்படை முகாம் அதிகாரிகளுக்குக் கிடைத்த ரகசியத் தகவலையடுத்து முன்னெடுக்கப்பட்ட விசேட தேடுதல் வேட்டையின் போதே இந்த ஆயுதங்கள் கைப்பற்றப்பட்டன.
நீண்டகாலமாக மரப்பொந்து ஒன்றினுள் நுட்பமான முறையில் மறைத்து வைக்கப்பட்டிருந்தமையால், மீட்கப்பட்ட துப்பாக்கி மற்றும் அதன் பாகங்கள் பெரிதும் துருப்பிடித்த நிலையில் காணப்படுகின்றன. இந்தத் தேடுதல் நடவடிக்கையின் போது ஒரு ஸ்னைப்பர் துப்பாக்கி, அதனுடன் பொருத்தப்படும் ஒரு தொலைநோக்கி (Telescope), ஒரு ரவைக்கூடு (Magazine) மற்றும் 7 தோட்டாக்கள் (Live Ammunition) என்பன கைப்பற்றப்பட்டதாக காவற்துறையினர் தெரிவித்துள்ளனர்.
முன்னாள் விடுதலைப் புலிகளின் முக்கிய முகாம்கள் அமைந்திருந்த கஞ்சிகுடியாறு காட்டுப்பகுதியில், யுத்த காலத்தில் இவற்றுடன் தொடர்புடையவர்களால் இவை மறைத்து வைக்கப்பட்டிருக்கலாம் என சந்தேகிக்கப்படுகிறது. கைப்பற்றப்பட்ட அனைத்து ஆயுதங்களும் மேலதிக சட்ட நடவடிக்கைகள் மற்றும் தீவிர விசாரணைகளுக்காக தமண காவல் நிலையத்தில் விசேட அதிரடிப்படையினரால் ஒப்படைக்கப்பட்டுள்ளன. இது குறித்த மேலதிக விசாரணைகளை தமண காவற்துறையினர் முன்னெடுத்து வருகின்றனர்.
Spread the love
